Bianca Censori ka tërhequr përsëri vëmendjen e publikut dhe mediave përmes një serie të re fotografish, ku pozon me një veshje transparente të markës Yeezy pranë bashkëshortit të saj, Kanye West.
Imazhet janë realizuar në një parking nëntokësor dhe fillimisht u postuan në llogarinë e Censorit në Instagram. Fotot u publikuan gjithashtu nga stilisti dhe fotografi Gadir Rajab, i cili i shoqëroi me përshkrimin: “Vala e të nxehtit në Europë”.
Në një prej pozave, 31-vjeçarja australiane qëndron krah reperit. Ajo shfaqet me një prej veshjeve transparente që janë bërë pjesë e stilit të saj, ndërsa Kanye West është veshur nga koka te këmbët me të zeza dhe mban syze dielli.
Disa ditë më herët, çifti ishte parë në klubin e natës Circoloco në Ibiza, ku Bianca Censori kishte zgjedhur të njëjtën paraqitje. Kjo dalje ndodhi pak përpara performancës së planifikuar të Kanye West në Madrid.
Zgjedhjet e veshjeve të Bianca Censorit kanë shkaktuar vazhdimisht diskutime në rrjetet sociale. Shumë persona kanë ngritur dyshime se stili i saj mund të ndikohet nga bashkëshorti.
Në një intervistë për Vanity Fair, Censori i ka mohuar këto pretendime dhe ka thënë se veshjet e saj janë pjesë e një krijimtarie të përbashkët.
“Nuk do të bëja kurrë diçka që nuk dua ta bëj”, deklaroi ajo, duke e përshkruar paraqitjen e saj si rezultat të një “bashkëpunimi” me Kanye West.
Ajo ka nënvizuar edhe se martesa e tyre është ndërtuar mbi dashurinë dhe jo mbi përfitime personale.
“U martova me të sepse e dua. Nuk u martova me të për të fituar një platformë apo famë”, u shpreh ajo./TAR
