Analisti Ergys Mërtiri tha se rinumërimi i votave në qarkun e Tiranës nuk është një aksion i opozitës, por aksion individual i kandidatëve.
Në një lidhje të drejtpërdrejt në edicionin qendror të lajmeve në Vizion Plus me moderatorin Roland Zilin, Mërtiri deklaroi se rinumërimi i votave largon vemendjen nga fokusi kryesor i opozitës që është lufta për votën e lirë.
Analisti u shpreh se sistemi ka ndryshuar dhe se votat nuk vidhen në numërim, por gjatë fushatës në terren.
Ergys Mërtiri tha se forcat e reja duhet të këmbëngulin tek ndryshimi i kodit elektoral.
Intervista e plotë:
Shumë shpejt do të kemi rinumërim të votave në Tiranë, por jo vetëm. Si e shihni ju këtë strategji që po ndjek opozita sa i takon 11 majit? Çfarë pret ajo?
Mërtiri: Ky nuk është aksion i opozitës, është aksion individual i kandidatëve të opozitës që kërkojnë votat e tyre. Madje, opozita duket se nuk ka qenë e gatshme ta miratojë këtë aksion, sepse e ka vonuar. Sigurisht, kjo për opozitën e largon vëmendjen nga fokusi kryesor, lufta për votën e lirë, për të cilën pretendojnë se u është vjedhur nga qeveria.
Deri më tani, hapja e disa kutive ka rrëzuar pretendimet e opozitës. Sa pasoja mund të ketë kjo për vetë Partinë Demokratike?
Mërtiri: Prej kohësh tashmë është bërë e qartë se votat nuk vidhen në numërim. Sistemi i ri ka ndryshuar. Tani kemi të bëjmë me inxhinierim të votës përmes pushtetit, parave dhe në rastin më të keq përmes grupeve kriminale që blejnë vota në terren. Ky është problemi. Por, edhe ky inxhinierim ka një kufi. Mund të ndikojë në 2-3-4 mandate, por jo në një diferencë aq të madhe sa ajo mes PS dhe PD. Diferenca prej 300 mijë votash, për mua, tregon një humbje të thellë. Sa do të jetë inxhinierimi i Ramës, ai është shumë i vogël përballë kësaj humbjeje të PD-së.
Berisha deklaroi se do të bëhen protesta edhe jashtë shtetit. Ku e çon kjo rrugë opozitën?
Mërtiri: Kjo është një rrugë e provuar. Ka katër vite që ndjek të njëjtën strategji. Nuk është hera e parë që protestohet në Bruksel, apo gjatë samiteve në Tiranë. Nuk është hera e parë që sillet vërdallë, që godet me gurë apo bën mosbindje civile. Opozita ka humbur dhe tashmë nuk i beson më askush. Ajo ka nevojë për një alibi dhe për një aksion, por është e vështirë të ndërmerren në kushtet kur besueshmëria është zero.
PD po bën betejë në KQZ, në Komisionin e Ankimimeve e kështu me radhë, ndërkohë që forcat e reja politike nuk janë ankuar. Si e shihni këtë?
Mërtiri: Kjo është tipike për situatat kur zhurma dhe konflikti tërheqin totalisht vëmendjen. Partitë e reja e kanë të vështirë të përfshihen, sepse do të identifikoheshin me atë që po bën Berisha, dhe kjo në opinionin publik krijon një imazh negativ. Ajo që është problematike, dhe ku partitë e reja duhet të këmbëngulin, është kodi elektoral. Ndoshta ato sot mund të kishin 10-14-15 deputetë. Për më tepër, është klima polarizuese që kanë krijuar Rama dhe Berisha me idenë se duhet të mblidhemi përballë rrezikut tjetër. Kjo është një strategji që përdoret për të ndaluar aktorët e rinj të hyjnë në skenë. Rama dhe Berisha mbrojnë këtë bipolaritet, Rama të qëndrojë në pushtet dhe Berisha në opozitë. Bien dakord për këtë.
