Me 84 vota pro dhe 3 kundër, Niko Peleshi u zgjodh pasditen e kësaj të premteje, 12 shtator, kryetar i Kuvendit të Shqipërisë.
Në fjalën e tij, Peleshi tha se ky post ishte “një nder e përgjegjësi e madhe”, të cilin e pranonte me përulësi dhe përkushtim.
“Të dashur qytetarë të Shqipërisë,
Të nderuar ambasadorë, përfaqësues të trupit diplomatik, të nderuar përfaqësues të komuniteteve fetare, drejtues të institucioneve të pavarura.
Të nderuar zonja dhe zotërinj deputetë.
Besimi që më dhatë sot, duke më zgjedhur kryetar të Kuvendit, është një nder e përgjegjësi e madhe, të cilin e pranoj me përulësi dhe përkushtim.
Përvoja ime e punës në parlament, dijet dhe energjitë e mia do të vijnë në shërbim të këtij Kuvendi, të Shqipërisë, qytetarëve.
Jam ftuar nga kryeministri Edi Rama, dhe mbështetur më pas nga Partia Socialiste, për të kryer këtë detyrë shtetërore, në një moment kritik e historik për Shqipërinë. Një moment që do mbahet mend gjatë, ndaj ndihem dyfish i vlerësuar.
Angazhohem për ta kthyer këtë besim në një shtysë për të punuar çdo ditë. Dëshiroj të falenderoj zonjën Elisa Spiropali, për kontributin e vyer, standardin e lartë të punës dhe dedikimin e saj si kryetare Kuvendi gjatë vitit të fundit”, tha ai.
Ndërkohë jashtë sallës së Kuvendit Sali Berisha justifikoi bojkotin e Partisë Demokratike në zgjedhjen e kryeparlamentarit.
Ai tha se mbi Niko Peleshin rëndojnë pesë dosje korruptive dhe se Parlamenti është i jashtë ligjshëm.
“Ky është parlamenti i karteleve. Në parlament më të përfaqësuarit janë kartelet e drogës më të fuqishme në Europë. U shkelën parimet kushtetuese.
Niko Peleshi është me 5 dosje korrupsioni, është i akuzuar për prona në Kolonjë dhe zona të tjera kur ka qenë ministër Bujqësie. Ai është një qenie amorfe. Në vend që të shkojë në burg, merr kreun e parlamentit, vetëm se ka vjedhur bashkë me Ramën” – tha Sali Berisha.
