Ministri i Jashtëm gjerman, Heiko Maas, u bëri thirrje të premten të dy palëve në zgjedhjet e SHBA që të tregohen të përmbajtur derisa rezultatet të jenë përfundimtare, duke shtuar se sjelljet që përkeqësojnë tensionet janë të papërgjegjshme.
“Amerika është shumë më tepër sesa një shfaqje me një person (One-man Show). Kushdo që vazhdon t’i hedhë benzinë zjarrit në një situatë të tillë, është i papërgjegjshëm” – tha Maas për mediat gjermane me një gjuhë të pazakontë.
“Tani është koha për të ruajtur qetësinë derisa të kemi rezultatin final dhe të pavarur” – shtoi ai.
Numërimi po vazhdon teksa rezultati mbetet i ngushtë mes Joe Biden dhe Donald Trump, shkruan javanews. Ndërkohë presidenti amerikan vijon akuzat duke nxitur tensione mes republikanëve dhe demokratëve.
“Humbësit e denjë janë më të rëndësishëm për një demokraci, sesa fituesit rrezëllitës” – tha ministri gjerman.
Kujtojmë se gjatë kohës si President, Donald Trump ka pasur një marrëdhënie të tensionuar me kancelaren gjermane Angela Merkel. Ai i ka bërë presione Gjermanisë për të kontribuar më shumë në shpenzimet e mbrojtjes së NATO-s, si dhe për çdo temë tjetër të mundshme, duke filluar nga ndryshimi i i klimës, te diplomacia dhe koronavirusi.
(Përgatiti JavaNews / a.r)
