Lideri i demokratëve Lulzim Basha ka zhvilluar një sërë takimesh në Berlin, së fundmi me ish Presidentin e Parlamentit Europian Hans-Gert Pöttering, aktualisht president i Fondacionit Konrad Adenauer (KAS) të CDU-së të Kancelares Merkel.
Në bashkëbisedim Basha ka falenderuar Pöttering për mbështjejen që po jepet në lidhje me hartimin e programit qeverisës së PD-së.
Basha tha se programi qeverisës parashikon taksa të ulëta, investime që sjellin zhvillim dhe hapin vende pune dhe kujdes social. Keqqeverisja dhe kriza ekonomike, tha Basha, kanë shkaktuar drama të mëdha njerëzore dhe sociale.
Basha ka folur në lidhje dhe me zgjedhjet e kandidatëve për deputet në PD, ku ka theksuar se përmes një procesi të hapur, po merren propozime jo vetem nga anëtarësia e PD, por edhe nga qytetaret
Kandidatët, shtoi Basha, do t’i nënshtrohen një kontrolli të pastërtisë së figurës dhe përmes një procesi transparent, do të përgjidhen më të mirët, më të kualifikuarit dhe njerëzit që gëzojnë integritetin më të lartë në zonat ku do të kandidojnë.
Në kuadër të bashkëpunimit me Fondacionin Konrad Adenauer dhe CDU një ekip ekspertësh do të mbërrijë në Tiranë në mes të shkurtit për një sërë seancash pune me përfaqësuesit dhe ekspertët e PD. /java/a.k
