Kryeinspektori, Dashnor Sula, në një intervistë në Edicionin Qendror të Lajmeve në televizionin kombëtar Vizion Plus, të moderuar nga Aleksandër Furxhi, ka folur edhe për të shkuarën e tij politike, si dhe marrëdhëniet e sotme me kryeministrin Edi Rama.
I pyetur nga Furxhi në lidhje me akuzat e Berishës, i cili është shprehur se Sula duhet të ishte larguar më herët nga PD-ja, kryeinspektori, me ironi, tha se kryedemokratin e ka marrë malli.
Sula theksoi se ishte vetë zoti Berisha ai i cili prishi gjithçka, duke injoruar primaret.
Sa i përket marrëdhënieve me kryeministrin Rama, Sula tha se ka komunikim të vazhdueshëm, pasi bëhet fjalë për problemet e qytetarëve.
Ndërsa theksoi se edhe me zotin Berisha, në të shkuarën, ka pasur komunikim në orët e vona të natës, por vetëm kur bëhej fjalë për kriza.
Pjesë nga biseda:
Furxhi: Ju vini nga politika, keni qenë deputet i Partisë Demokratike, prej shkurtit jeni në këtë pozicion në establishment pranë qeverisë. Z.Berisha dje ka thënë për ju se Dashnor Sula më mirë të kishte ikur më herët. Keni ndonjë përgjigje tani?
Sula: Ajo është një dëshirë e zotit Berisha e kahershme me sa duket. Por z.Berisha me sa duket e ka marrë malli shumë për mua, sepse nga marsi i vitit 2025, kur kemi komunikuar për herë të fundit, ishin të famshmet primare të cilat i rrëzoi, i injoroi dhe nuk i respektoi. Tani ka një ndryshim të madh, nëse unë si kryeinspektor i përgjithshëm sot komunikoj me kryeministrin Rama shpeshherë, pothuajse në mënyrë gati të përditshme, jo të përditshme, po gati të përditshme edhe në 12 të natës apo në ora një të natës, pikërisht për shkak të shqetësimit e problematikave që kanë qytetarët, ndaj të cilave kryeministri reagon dhe i drejtohet kryeinspektorit të përgjithshëm për të pasur qasjen e ndjekjes së problemeve ndaj qytetarëve, unë me z.Berisha kam pasur orare më të vona, deri në ora tre po thoshim ndonjëherë, sidomos në kohë krizash. Mund t’i kujtoj zotit Berisha zgjidhjen e krizës së vitit 2007 në zgjedhjen e presidentit, zotit Bamir Topi, në korrik…
