Mentor Beqiri, avokati i Jakup Krasniqit, në një intervistë ekskluzive për Klan News, e ka cilësuar vendimin e 16 shtatorit si të papritur dhe tronditës, duke pretenduar se ai nuk pasqyron provat e administruara gjatë procesit gjyqësor.
Beqiri tha se, sipas parashtrimeve të mbrojtjes, vendimi nuk përputhet me provat materiale të përfshira në dosjen e çështjes, dëshmitë e dhëna në sallën e gjyqit dhe, sipas tij, me atë që realisht ka ndodhur gjatë viteve 1998-1999.
Avokati pretendoi gjithashtu se trupi gjykues ka konstatuar se Krasniqi nuk ka qenë i përfshirë në veprime që mund ta inkriminonin atë.
Sipas Beqirit, dënimi ndaj Krasniqit lidhet me postin politik që ai ka mbajtur, duke e cilësuar një gjë të tillë si të papranueshme.
Ai theksoi se mbrojtja ka pasur qasje në të gjitha provat e administruara gjatë procedurës dhe, sipas tij, qëndrimi i saj është se Krasniqi nuk ka pasur përfshirje direkte apo indirekte në veprimet për të cilat është konstatuar përgjegjësia nga Gjykata.
“Verdikti i datës 16 shtatorit ishte sa i papritur dhe aq tronditës për shkak se sipas parashtrimeve tona, i njëjti vendim nuk pasqyron provat materiale që gjenden në shkresat e kësaj lëndë, I njëjti vendim nuk pasqyron dëshmitë e dhënë nga ana e dëshmorëve të dhënë në sallën e gjyqit. I njëjti vendim nuk pasqyron realitetin apo gjendjen faktike se çfarë ka ndodhur gjatë viteve 1998-1999. Trupi gjykues konstatoi se nuk ka qenë i përfshirë në asnjë veprime që mund ta inkriminonte atë. Janë dënuar për shkak të posteve politike që kanë pasur dhe kjo është e papranueshme. Mbrojtja ka pasur qasje në të gjitha provat në këtë procedurë. Më përgjegjësi të plotë themi se Jakup Krasniqi nuk ka qenë i përfshirë në mënyrë direkt apo indirekt në asnjë nga ato veprime, për të cilat tha Gjykata”, tha ai.
Ai pohoi se pavarësisht vendimit, do vazhdojnë të besojnë se drejtësia do të vihet në vend për Jakup Krasniqin dhe tre ish-krerët e tjerë të UÇK-së.
“Besojmë se drejtësia se do vihet në vend, përkundër procedurave të pazakonta“, theksoi ai.
