Kreu i Partisë Demokratike, Sali Berisha, nga spitali ku vizitoi protestuesit e lënduar, akuzoi policinë për veprime në kundërshtim me ligjin.
“Njëri është në gjendje kontuzioni, me një hematomë serioze. Do i bëhet një skaner për të parë shkallën e dëmtimit. Tjetri është protestues që qëllohet me snajper nga mbrapa kokës, në mes të rrugës. Një kriminel me uniformë, gazin nuk e hedh në rrugë, por e gjuan në kokën e protestuesit. Ka kontuzion serioz cerebral nga goditja dhe rrëzimi. Kanë qëlluar edhe Luçiano Boçin, të cilit i ka rënë bombula në trup dhe i ka djegur gishtat e njërës dorë”, deklaroi Berisha.
“Një pjesë e mirë e policisë ka treguar vetëpërmbajtje, por mes tyre ka patur kriminelë dhe të droguar që kanë kryer akte të tilla. Nuk ka asnjë anëtar të forcave të rendit me një gërvishtje të vetme. Protesta është paqësore dhe në tërësi i përgëzoj policët që treguan edhe mirëkuptim për frymën e protestës”, shtoi kreu demokrat.
Më tej, Berisha tha: “Siç i patë ju vetë hodhën në xhami bomba tymuese dhe bombola gazi, për të ua prishur namazin besimtarëve të cilët nuk kishin asnjë lidhje me protestën dhe nuk kishte asnjë protestë në territorin afër xhamisë. Përkundrazi për të ua respektuar siç duhet lutjen e tyre, faljen e tyre, ne zgjodhën territor tjetër përballje me narkopolicinë, por ata donin me çdo kusht, sepse xhaminë ata e pushtojnë. Këta kryen një akt kriminal, pushtojnë xhaminë çka është absolutisht e dënueshme, e ndaluar, por nuk pyesin. Por duket që kësaj here imami u ka kërkuar që të mos jenë në territorin e xhamisë dhe kanë hedhur për të helmuar besimtarët që po i luteshin Zotit pas iftarit”.
