Berisha u premton demokratëve: Ramën do ta mundim edhe 6 herë të tjera

Ish-Kryeministri Sali Berisha në fjalën që ka mbajtur në Kuvendin Kombëtar të PD ka thënë se hapja mbetet “leva e Arkimedit për të ndryshuar Shqipërinë”. Ai ftoi demokratët që të japin kontributin e tyre për fitoren e PD. Po ashtu, Berisha tha se PD-ja do ta mundë Ramën edhe 6 herë të tjera.

“Ky kuvend hap një kapitull historik për ne, kapitullin e marshit tonë drejt fitores. Shumë diskutojnë dhe pyesin: Po ku mundet Edi Rama? A nuk jemi ne së bashku që e kemi mundur 3 herë atë. Edhe 6 herë të tjera do ta mundim. Por ky marsh, ky udhëtim kërkon nga ne të bëjmë gjithçka për mendjen dhe zemrat e shqiptarëve. Para së gjithash për ata demokratë që mund të jenë të ftohur, mund të jenë edhe në hatërmbejtje, edhe të hidhëruar. Sot kemi këtu dhjetëra e qindra delegatë që para 6 Marsit ishim në pozicione të ndryshme. Më lejoni t’i falenderoj ata me mirënjohjen më të thellë për praninë në këtë sallë. Është i mirëpritur çdo demokrat në shtëpinë e tij, por e rëndësishme është që të rendim, të shtrijmë dorën ndaj çdo demokrati që nga viti ‘90 gjer sot, ta ftojmë të kthehet tek kontributi i tij, ta ftojmë të japë kontribut tjetër për fitoren e PD dhe do shihni që ne nuk do jemi, 40 apo 50 mijë, por ju garantoj 2 ose 3-fishi i tyre. Kjo është parti me histori Sot në misionin tonë, hapja, hapja dhe vetëm hapja është dhe do mbetet leva e Arkimedit për të ndryshuar Shqipërinë”. 

/a.r