As vërejtja e nënkryetarit të Kuvendit Vangjel Dule, nuk e ka ndalur ish-kryeministrin Sali Berisha që të akuzojë, 12 minuta mbi kohën e lejuar qeverinë dhe reformat e ndërmarra.
Sipas ish-kryeministrit qeveria e majtë po kryen anti-reforma siç është ajo e pensioneve. Ndërsa duke i lidhur reformat me eksodin ishkryeministri shtoi se kërkesat e shqiptarëve për azil janë më të larta edhe se të sirianëve.
Por pas kësaj Berisha është ndalur në sulmet personale, teksa e ka cilësuar fshatin Surrel, ku kryeministri Rama ka ndërtuar shtëpinë e tij, se është kthyer si në fshatin e Don Corleonëve.
“Ju flisni për reforma dhe i prisni kafshatën e gojës me një të rënë të lapsit 40 mijë familjeve shqiptare. Shqiptarëve të papunë i prisni pagesën pse reformë qenka kjo? Këto janë çnjerëzore, ju po shkatërroni qeniet njerëzore në këtë mënyrë..sa kanë ikur? Sa po ikin? Shqiptarët lanë mbrapa edhe sirianët me kërkesat për azil, eksodi është shpërbërja e kombit, një komb në eksod është një komb në shpërbërje dhe ju këtu ..këndoni dilni krenarë..Po kjo nuk shkon, përgjegjësia qytetare është përgjegjësi qytetare..Në Korçë dhe Myzeqe i latë prodhimet të kalben, ju mbushnit xhepat nga eksportet. Pa llogaritur këtu heqjen e shpërblimit të fundvitit..Surreli si me qenë fshati i Don Corleones..Shkoni ndiqni ministrat si u pasuruan, dasmën thotë ma bëri mamaja, del me 200 mijë euro vila dhe thotë se punët e mira bëhen pa lekë .Ky është slogani i hajdutet.. këto janë standardet këto janë reformat? Këto janë antireforma ”tha Berisha.
Në sulmet e tij- ish-lideri i demokratëve i ka vijuar edhe me kandidadin e majtë për bashkinë e Tiranës Erion Veliaj, në kohën kur ky i fundit ishte ministër. Sipas deputetit të Erion Veliaj kishte marrë projektin e Traku Fest në Gjirokastër, ndonëse i ishte ngarkuar Ministrisë së Kulturës. Dhe Berisha e ka një shpjegim për këtë punë dhe ajo ka të bëjë me faktin se me ato para Veliaj bëri dasmën e tij.
“KLSH gjeti se Traku Fest nuk u zhvillua fare. i përkiste ministrisë së kulturës ndërkohë që do e bënte ai që të merrte lekët e dasmës. Po të vret zoti mo të bësh dasmë me para të vjedhura të të varfërve. Pasuria dhe babëzia është bërë ligji juaj kryesor. Traku Fest do ta bënte ministria e Kulturës, por ia dha për favor që të bënte dasmën e Veliajt. Në teatër një bizhozxhi ka vendosur sekretaren ideatorë të teatrit. Vëllai i ministres është i gjithëfuqishëm. Merr edhe drejtorin si aktor në pjesë. Drejtori do mbushë xhepat. Ka vendosur në opera kushërirën, por ama është përzënë nga çdo orkestër. Jo për paaftësi, por është përzënë sepse….shikoni se po shkatërrohet opera. Nëse i shkatërroni këto institucione, i keni shkatërruar vendit një nga gjërat më të çmuara”, tha Berisha.
Nga ana e saj Ministrja Kumbaro ftoi deputetët të merrnin pjesë në Festivalin e Gjirokastrës, ndërsa duke iu kthyer përgjigje ishkryeministrit Berisha, tha: Kjo javë ka qenë e jashtëzakonshme për Kulturën. Ajo kala e mrekullueshme është kthyer në djep kulture me shumë më pak lekë se sa koncerti i 2012. Sa për operën kemi shitur trefishin e biletave, ka dhënë 25 premiera, kanë ardhur 4 herë më shumë yje të operës botërore”, tha ajo.
