Ish Kryeministri Berisha ka sulmuar ashpër ambasadorët e SHBA-ve dhe BE-së Lu e Vlahutin, duke i quajtur ata si guvernatorët me të cilët, kryeministri Edi Rama po qeveris vendin dhe po kryen në interes të tij reformën në drejtësi.
“Dy ambasadorët, Lu dhe Vlahutin sillen si Guvernatorë këtu. Nuk ndodh në asnjë shtet në botë kjo që ambasadorët të sillen si Guvernatorë.“-tha Berisha.
I ftuar në emisionin “Studio e Hapur” në news24, Berisha ka mbrojtur nga ana tjetër prokurorin e përgjithshëm Llalla duke thënë se në konfliktin e tij me ambasadorin Lu, ky i fundit në mënyrë të paprecedentë ka sulmuar prokurorin, por nga ana tjetër nuk ka përgënjeshtruar akuzat se ai ka ndërhyrë në hetimet ndaj Bankers.
“Ka patur një duel me prokurorin, ambasadori amerikan ndalon vizën e prokurorit. Dakort, nëse ka shkelur ligjin. Akuzoi prokurorin se ka bllokuar reformën… Unë nuk e di sesi mund të bllokojë e të jetë kundër reformës prokurori i përgjithshëm.
Ai është sjellë si politikan me Llallën. Ai është kryeprokurori. Unë mund të abuzoj me Kushtetutën, por jo ambasadori. Ai i ka kërkuar kryeprokurorit të ndërpresë hetimet për Bankers Petrolum. Kjo është e paprecedentë. Lu bën kështu se ka një kryeministër legen në krye të Shqipërisë.
Pse nuk përgënjeshtron ambasadori Lu atë për të cilën e akuzoi prokuroria? E them këtu, kur dikush ma ka bërë këtë kur kam qenë President Rpublike, i kam thënë mos më bëj kërkesa të tilla staliniste… dhe ai që më ka thënë kështu ishte shumëfishi i këtij që është sot këtu… ai ishte Richard Shifter.”-tha Berisha./a.k
