Ish-Kryeministri Sali Berisha ka sqaruar postimin e bërë mbrëmjen e sotme në rrjetin social Facebook ku paralajmëronte një bojkot të zgjedhjeve nga ana e PD. Në një intervistë telefonike për Top Channel, Berisha theksoi se nuk bëhet fjalë për bojkot por për shkelje të standardit të zgjedhjeve pasi sipas tij administrata shtetërore është përdorur gjërësisht në fushatë nga mazhorancë si dhe futja e kandidatë me të shkuar kriminale në listat e mazhorancës.
Sa i përket qëndrimeve të ndryshme mes kreut të PD Lulzim Basha dhe ish-liderit, Berisha tha se ky është një mendim i tij, i faktuar edhe me prova me tentativat për manipulim të zgjedhjeve të mazhorancës.
“Ka kandidatë me të shkuar kriminale për të cilën ndërkombëtarët bëjnë thirrje të mos përfshihen ndërsa kryeministri i vendit i certifikon. Gjithnjë punonjësit e administratës për mendimin tim kanë marrë dhe duhet të marrin pjesë në fushatë elektorale, por këtë radhë gjithcka u vu në funksion të mazhorancës. Nuk ka ndodhur kurrë në asnjë vend që të sekuestrohet një televizion që ishte kritik ndaj qeverisë. Akti ishte më i poshtri, më i ulëti më i pafytyri sepse ashtu sic i ndërron Rama corapet e tij, por para se ta shpallë të tillë për pastrimin e parave qeveria duhet të flasin organet kompetente. Kjo ishte armiqësi personale si ndaj Fullanit. Absolutisht që Rama ka kontroll mbi Prokurorinë. S’mund të shpallet dikush fajtor pa folur gjykata. Bandat e lidhura me qeverinë kanë bërë fushatë 1 muaj rrjesht. Kjo është e vërtetë. Atëherë a do të përligje komuniteti ndërkombëtarë ku krimi triumfoi, dhe mbi të gjitha u krijua pabarazia më e madhe. Unë i bëj thirrje PD që të mos bojkotojë procesin, dhe komisionerët të kryejnë detyrën përpara ligjit. Ky është dallimi mes nesh, ne nuk bojkotojmë por do të bëjmë betejën më të madhe për qytetarët. Jo bojkot në asnjë mënyrë, por ne do të vazhdojmë betejën tonë se në këto zgjedhje u dhunuan parimet e ndershme. Qëndrimi im nuk ka të bëjë me rezultatet por me standardin e këtyre zgjedhjeve.” u shpreh Berisha
