Nga Artur Ajazi
Edhe në vajtjen e tij të dytë për “tu paraqitur” në SPAK, kreu i PD-së Sali Berisha, mbajti goxha fjalim në dalje. Ishte fjalimi i rradhës, dha “pretenca prokurorësh”, lexoi “hetime mbi grupet armiqsore”, akuzoi dhe ç’nuk tha mbi kundershtarin politik. Dukej si Aranit Çela në vaktit, tek lexonte “akt-akuzat”, dhe kritikonte prokurorët e SPAK-ut se “nuk dinin ta bënin mirë detyrën”. U foli Berisha të pranishmëve mbi “situatën e krimit dhe korrupsionit”, dhe u betua se “do të nxirrte nga qytetari dixhital edhe dosje të tjera”. Kjo pra, është opozita.
Një opozitë që merret me dosje dhe fashikuj të “përkthyer dhe zbardhur nga qytetari dixhital”, të cilat Berisha i servir si “fakte dhe argumente për fushatën dhe fitoren e opozitës”. Kjo pra është partia që pretendon dhe pret “fitoren mbi qeverisjen e Edi Ramës në 11 Maj”, duke marrë rolin e prokurorit, gjyqtarit, ministrit, policit, dhe mbi të gjitha këto, “të qytetarit dixhital”.
Një opozitë që deri sot ka premtuar vetëm 2 gjëra “largim të policëve dhe prokurorëve sa të vijë në pushtet dhe rritje rrogash dhe pensionesh si në Hollandë”. Hajde po deshe dhe besoi kësaj opozite pushtetin, votën, të ardhmen e fëmijëve dhe familjeve tona.
Një opozitë që flet dhe vulos sikur të ishte viti 1992 apo 1996, dhe jo 2025. Një opozitë që thyen ligjet, fyen institucionet, ofendon ambasadorët, një opozitë që arrnon programet e dikurshme, dhe del i prezanton si “programet e qeverisjes re”. Por më famozi mbetet Doktori. Në çdo konferencë shtypi, apo dhe dalje nga dera e SPAK-ut, ai patjetër do të lëshojë akuza, do të japë pretenca dhe vendime gjyqsore, madje do ti përcaktojë kundërshtarit politik edhe “sa vjet burg rrezikon kur të vijmë ne pushtet”.
Një opozitë që ka krijuar korin e uluritësve, që dalin mes bulevardit të Tiranës, dhe shajnë me libër shtëpie Erion Veliajn, Edi Ramën, ministrat meshkuj dhe femra, që merren me jetën e tyre private dhe familjare, dhe pastaj kënaqen kur Doktori u thotë me sms se “bravo je qëndrestar, do të jap post në qeverinë e re”. Flet për çdo marifet Doktori, por nuk u thotë mbështetësve të tij asgjë për akuzat e SPAK, për Gerdecin, 21 Janarin, për pasuritë dhe milionat e tij dhe oborrtarëve.
Nuk u thotë asgjë për fajet dhe gabimet e opozitës dje dhe sot. Por u tregon barcaleta dhe përralla me pushtet, të cilat jo se i beson njeri, por ata që i shkojnë pas, u pëlqen ti dëgjojnë shpesh, sepse u duket sikur vërtetë do të vijnë një ditë në qeverisje kur Berisha të bëhet “mbret”.
