Sali Berisha ka kthyer në vëmendje një nga deklaratat më të debatuara të kryeministrit Edi Rama nga fushata zgjedhore e 2021 për të hedhur akuza ndaj qeverisë. Bëhet fjalë për sjelljen e punëtorëve nga vende të tjera të botës si Sri Lanka, Bangladeshi dhe India që sugjeroi kreu i qeverisë, por Berisha thotë se nuk do të vijnë për punë.
Në prezantimin e Alfred Gegës si kandidat i koalicionit opozitar për bashkinë e Maliqit, Berisha tha se punëtorët nga vendet e tjera do të vijnë për trafik qeniesh njerëzore.
“Do të shpëtojmë shqiptarët nga pushteti i atyre që përdorën atë në mënyrën më të shfrenuar për pasurimin e vet. E përdorën atë në mënyrën më të pamëshirë për vjedhjen tuaj. E përdorën atë në mënyrën më të pamëshirë për mashtrimin tuaj.
E përdorën atë në mënyrë të pamëshirë për përzënien tuaj nga votat tuaja, dhe sot të pashpirt, të pangopur, pasi kanë përzënë 1 milionë shqiptarë në 8 vite deklaronin se do sjellim familjarë dhe punëtorë nga Sri Lanka, Bangladeshi dhe India. Dhe këta, iu garantoj për trafik të qenieve njerëzore, dhe jo për të punuar këtu”, tha Berisha./m.j
