Edhe pse Edi Rama refuzon çdo përballje mediatike me të, Sali Berisha thotë se ballafaqimin në studio me Kryeministrin e kërkon edhe për një tjetër arsye, veç asaj për programet elektorale.
“Eksperienca të mëson shumë thotë latini. e ftoj të ballafaqohemi pak dhe të shohë se kush ka shenja të rrjedhjes dhe të vijmë e tua tregojmë shqiptarëve. Mjafton të shohësh ekuilibrat e Edi Ramës. Shkel çdo ligj dhe bën çdo gjë për votë, por i pashpresë nga verdikti i shqiptarëve”, tha Berisha.
Superskandal e cilëson deklaratën e kreut të qeverisë, i cili nga Gjirokastra e etiketoi politikisht “autike” opozitën.
“Përçmimin ndaj fëmijëve, e kanë patur Adolf Hitleri dhe ai me një dekret i fuste në krematorium. E ka pasur Enver Hoxha për qëllime klasore. Ky është një super skandal. Është turp të quhet prind, bashkëshort, baba.”, tha Berisha.
Pas qëndrimit të Kryeministrit me të rinjtë për fotot e tij nudo, Berisha tha se duhet të veprojë menjëherë ligji.
“Në ligj kombëtar dhe ndërkombëtar ata që kanë kryer akte të tilla, janë përjashtuar nga gara zgjedhore dhe janë ndëshkuar me ligj. Nuk mund të nxjerrësh në pazar ti, nuditetin, lakuriqësinë tënde, kurrë, sepse ka një kod etik moral, shoqëria njerëzore”, tha Berisha.
Edi Ramën e ftoi të mos ia qajë hallin kalorësit kur bëhet fjalë për drejtuesin e fushatës së tij.
“Makthi i tij është Chris LaCivita, shkalloi pas shfaqjes së Chris pas Sali Berishës. Mos i qaj hallet kalorësit se i varen këmbët”, tha Berisha.
Akuzat në adresë të qeverisë dhe zyrtarëve të saj kryedemokrati i vijoi edhe gjatë një takimi që pati për sigurinë ushqimore.
“Kontrolli është në kthetrat e mafies, urdhëro, laboratorit shtetëror, ministri ia merr kompetencat dhe ia jep një laboratori privat në shembullin e atyre PPP-ve të shëndetësisë për të ndarë paratë me të”, tha Berisha.
Berisha u zotua për luftë me tolerancë zero ndaj korrupsionit si dhe futjes së produkteve e ushqimeve kancerogjene që sipas tij gjenden në treg.
