Partia Demokratike ka organizuar dje një ceremoni me rastin e 25-vjetorit të Grevën së Urisë. Greva e studentëve u pasua më pas nga protesta që çuan në rrëzimin e bustit të Enver Hoxhës, më 20 shkurt. Në ceremoninë e organizuar nga Partia Demokratike ishin të ftuar pjesëmarrës në atë lëvizje të zhvilluar 25 vite më parë, deputetë dhe personalitete të tjera. Ceremonia u zhvillua në Qytetin Studenti. Ish-kreu i Partisë Demokratike, Sali Berisha, paraqiti një version të vetin rreth zhvillimeve 25 vjet më parë. Sali Berisha tha se Ramiz Alia në atë kohë ishte ende një kërcënim i madh për vendin dhe për vetë Partinë Demokratike. Ai sqaroi raportin e PD me grevën e urisë, ndërsa shtoi se Partia Demokratike ishte në shënjestër të sulmeve të shtetit komunist. Por, një tjetër panoramë paraqiti Mark Marku. Ish-deputeti demokrat rrëzoi deri diku versionin e Sali Berishës. Ndryshe nga Berisha, Mark Marku tha se kjo lëvizje nuk ka pasur heronj. Sipas tij, nuk ishte e nevojshme që studentët të bëheshin heronj për bërë ndryshime në të mirë të shoqërisë.
Berisha për Lëvizjen Studentore
Sali Berisha tha dje se Partia Demokratike ka qenë organizatore e grevës së studentëve. Ai shtoi se këtë PD e ka bërë larg vëmendjes. “Në një pasdite ai prodhoi qindra postera dhe i shpërndau në të gjithë Qytetin Studenti duke bërë thirrje për protestë. Aty përcaktohet komisioni drejtues dhe kërkesa për heqjen e emrit të Enver Hoxhës nga UT, pasi këta ishin krahu studentor i PD dhe dihet se nismëtarët e grevës ishin anëtar të PD. PD nuk donte të dilte si protagoniste e grevës sepse kërkonte që ajo të ishte një Lëvizje Studentore kundër qeverisë sepse greva mund të paragjykohej.
Studentët filluan negociatat me Ramizin. Njëherë Ramizi propozoi një referendum me ata që janë diplomuar për heqjen ose jo të emrit të Enverit. Ne propozuam që referendumi të bëhej me të gjithë profesorët dhe studentët por Ramiz Alia refuzoi”, ka rrëfyer dje ish- kryeministri Sali Berisha. Ai tha se Azem Hajdari ishte ai që ka kërkuar rrëzimin e shtatores së diktatorit Enver Hoxha nga qendra e kryeqytetit. “Kërkesën e parë publike në protestë për heqjen e shtatores e ka bërë Azem Hajdari. Ne nuk kishim në kërkesat e studentëve heqjen e shtatores. Azemi kishte idenë të bënim një miting në shesh dhe më pas tha ai, t’i marr e ta fshijmë bustin. Ai kishte përgatitur parullën “Te sheshi” dhe kjo parullë nënkuptonte rrëzimin e bustit”, tha Berisha. Ish-kryeministri foli dhe për një djalë 17-vjeçar që thërmoi bustin e Enver Hoxhës.
“Fallangat komuniste morën një bust allçie të Enverit disa ditë pas rënies së bustit dhe e vunë atë ku ishte piedestali i Enverit dhe i kërcënonin qytetarët që të mos afroheshin ndërsa i shanin. Një super hero 17 vjeç vjen nga mbrapa sepse vendi ruhej me armë, e kap bustin e dhe thyen copa- copa. E thërrmoi bustin dhe erdhi me vrap u bashkua me qytetarët. Mirëpo duke qenë se nuk e sulmonin dot dhe duke mos patur bustin, ikën”, tha Berisha
Sot
