Ish-kryeministri Sali Berisha nuk po merr pjesë në seancën e parë të themelit në GJKKO për aferën partizani. Por nga SPAK, ku paraqit për masën detyrim paraqitjeje, Berisha komentoi këtë proces, duke thënë se po fillon mbi një bazë jashtëligjore.
Në seancën e sotme gjyqësore për dosjen “Partizani”, avokati i ish-kryeministrit Sali Berisha, Genc Gjokutaj, paraqiti një kërkesë paraprake për shpalljen e pavlefshmërisë së akuzës dhe të gjithë akteve që rrjedhin prej saj.
“Kërkojmë konstatim të pavlefshmërisë absolute të vendimit për marrjen të pandehur, komunikimin e akuzës dhe çdo akt që rrjedh prej tij”, tha Gjokutaj.
Sipas tij, prokuroria ka tejkaluar kompetencat kushtetuese duke shprehur opinione politike dhe jo duke përfaqësuar interesat e shtetit. “Ngritja e akuzës nuk është kryer në funksion të ushtrimit të kompetencës së saj. Prokuroria nuk ka përfaqësuar interesat e shtetit, por të një force politike, me qëllim mbajtjen në pushtet të saj”, deklaroi avokati, shkruan A2 CNN.
Gjokutaj shtoi më tej se prokuroria ka marrë përsipër të vlerësojë cilësinë e qeverisë, çka sipas tij, nuk është kompetencë e saj ligjore.
