Ish-kryeministri Berisha ka komentuar letrën e deputetes Leskaj sa i përket kërkesës për ta çuar mandatin e saj në Kushtetuese. Duke folur pas përfundimit të seancës, Sali Berisha sulmoi edhe kryeministrin si njeri të lidhur me krimin dhe që po ndihmon përmes skenarëve Koço Kokëdhimën.
“Parlamenti ka hipur në lokomotivën Leskaj. Në këtë parlament çdo gjë i vendosin interesat e krimit me pushtet. Rama, si kreu i Meduzës dhe në ndihmë të sivëllaut Kokëdhima, krijon këtë situatë absurde në Kuvend ku de facto ai ka asgjesuar ligjin e konfliktit të interesit” – tha Berisha.
Deputeti demokrat e cilësoi Leskajn një kusare që po dorëzohet pas protestave të opozitës.
“Mandati i Leskajt është njësoj sikur një vrasës ti thotë shtetit: Më dëno se vrava. Një kusar shtetëror shkon e i dorëzohet shtetit sepse opozita po proteston dhe u bë çështje europiane” – tha Berisha sa i përket letrës së Valentina Leskajt drejtuar Metës.
