I mbetur vetëm në Partinë Demokratike, me aletë në burg ose nga ata të cilët i kërkojnë vetëm mandate, Sali Berisha ka nisur gjuetinë e afrimit të individëve përpara zgjedhjeve parlamentare të 2025, duke i bërë një ofertë indirekte Lulzim Bashës.
Duket se kryedemokrati ka hedhur një hap pas nga kushtet e tij kokëforta për pranimet në selinë blu, duke vendosur kësaj radhe të amnistojë Lulzim Bashën dhe të tijët.
Berisha beson se rotacioni politik në Shqipëri do të vijë vetëm nga Diaspora. Sipas disa shifrave që vetëm ai i di, shumica e shqiptarëve jetojnë jashtë vendit dhe jo brenda, ndaj dhe ka besimin se emigrantët do e votojnë atë e jo Ramën.
Madje Berisha ka shpresë edhe tek simotrat e Partisë Demokratike. Kjo dëshirë e tij, vjen nga shpresa se me ardhjen e Presidentit të ri të Shteteve të Bashkuara të Amerikës, Donald Tramp, non-grata në supet e tij do të hiqet, por sondazhet e instituteve republikane e nxjerrin po Berishën më pak të besuarin nga liderët politikë në Shqipëri.
Ndonëse premton prej kohësh hapje të Partisë Demokratike për të rinjtë, në Gjirokastër, ai vijon të ketë drejtues politik të preferuarin e tij Tritan Shehun, i cili në skenarin më të mirë, do të mbetet deputeti i vetëm i Partisë Demokratike për këtë qark.
Megjithatë, kryedemokrati nuk bën asnjë hap pas në përballjen me drejtësinë. Të hënën, ai duhet të paraqitet pranë oficerit të policisë gjyqësore në SPAK për të zbatuar masën e detyrimit të paraqitjes dhe me një mesazh në celular, ka udhëzuar të gjitha strukturat e Partisë Demokratike të mbledhin sa më shumë njerëz në orën 9:30 për ta mbështetur atë në ecejaken 2 minutëshe në derën e Prokurorisë së Posaçme./abcnews.al
