Nga Spartak Ngjela
Ka ardhur tamam koha kur Uashingtoni politik i nivelit të lartë duhet të ndërhyjë domosdoshmërisht duke evidentuar emrat që po pengojnë Reformën në Drejtësi.
Njëlloj si në vitin 1997 – dhe sërish kundër Sali Berishës. E njëjta gjë edhe sot, Berisha është sërish personi banditesk që kërkon të prishë Reformën perëndimore në Shqipëri.
Por tani, pas njëzet vjetësh janë dy; është dhe Ilir Meta. Në fakt janë binjakët që i lindi në një kohë korrupsioni dhe krimi shtetëror shqiptar.
Goditja e tyre me emra konkretë dhe me bëma konkrete nga politika e lartë amerikane është domosdoshmëri edhe për aktualitetin historik, edhe për aktualitetin politik në Shqipëri.
Edhe politika mesjetare greke, edhe politika e degraduar serbe, të dyja bashkë, i kane sy dhe veshët të ngritur drejt raportit korruptiv Meta-Berisha, për të bllokuar politikën amerikane në Tiranë.
Është sigurisht një shpresë e kotë. Politika amerikane e ka domosdoshmëri eliminimin e krimit shtetëror në Shqipëri, dhe shqiptarët e kanë domosdoshmëri ndërhyrjen e drejtpërdrejtë amerikane kundër krimit shtetëror shqiptar. Në fakt, ky është sot ekuacioni politik ballkanik që duhet ta zgjidhë me forcë politika e lartë amerikane.
Dhe duhet ta zgjidhë shumë shpejt. E kërkon koha….
