Kryesocialisti Edi Rama ka postuar sot në facebook serinë e radhës të “Thaje kënetën!’, episodi “Partia e Bufit, Këneta Madhështore”.
Ai mori për sfond një nga fjalimet e fundjavës së kreut të PD-së Sali Berisha në Pogradec, i cili mes të tjerash akuzonte se dëmet më të mëdha Shqipërisë ia kishin bërë “udhëheqësit e rinj xhelatë të moshës 20-30 vjeç, si Edi Rama dhe Enver Hoxha”.
Por përjashtonte veten e tij si anëtar i Partisë së Punës gjatë diktaturës dhe më pas si President.
Në video janë dhe episode nga trazirat e vitit 1997 dhe dhuna policore gjatë zgjedhjeve të vitit 1996 ndaj opozitës së PS. Më tej vijon momenti i dramës së piramidave, ku shqiptarët humbën kursimet e tyre.
Një këngë vaji e shoqëron në sfond, me tragjeditë në Otranto po në vitin 1997, me poshtëshënimin e Ramës: “Kur shqiptarët merrnin arratinë nga Shqipëria e Bufit…!”.
“S’ka më keq se kur s’di ç’flet”, shkruan Rama krahas videos.
