Ish-kryeministri Sali Berisha përmes një statusi në rrjetet sociale denoncoi hedhjen e gazit lotsjellës në ambientet e ALUIZNI-t në Durrës. I menjëhershëm ishte edhe reagimi i policisë e cila përmes një deklarate për mediat sqaron se kanë nisur hetimet, pasi persona brenda këtij institucioni kanë ndjerë një aromë mbytëse por pa specifikuar se për çfarë bëhet fjalë.
Më herët ish-kryeministri Berisha denoncoi ish-kreun e ALUIZNI-t dhe djalin e Lefter Kokës se kishin hedhur gazlotsjellës dhe po grisnin dosjet.
DEKLARATA E PLOTË
Durrës, më 22.05.2017. Informacion paraprak. Më datë 22.05.2017, rreth orës 15: 30 jemi njoftuar se në Zyrat e Aluiznit, Durrës personat e pranishëm kanë ndjerë një aromë mbytëse. Menjëherë në vendngjarje kanë shkuar Efektivet e Policisë, ku disa persona kanë shfaqur shqetësime në frymëmarrje, por pa probleme për shëndetin. Nga ana jonë është lajmëruar prokurori I gatshëm, Forcat Zjarrëfikëse dhe ambulanca, me qëllim parandalimin e çdo nevoje emergjente. Situata në këto momente është normale dhe theksojmë se në ambientet e Spitalit Rajonal Durrës nuk është paraqitur asnjë person. Është ngritur grupi hetimor dhe pritet të përcaktohet nga ekspertët lloji I lëndës e dyshuar e hedhur në këtë ambjent dhe zbardhjen e shkaqeve të ngjarjes.
