Ish kryeministri, Sali Berisha o zotua në Lezhë se do të rrëzojë kryeministrin Edi Rama nga pushteti jo vetëm me votë por edhe me mosbindje civile. Gjatë prezantimit të Pashk Gjonit si kandidat i Rithemelimit për bashkinë e Lezhës, Berisha kërkoi që të gjithë demokratët të cilët ende nuk kanë zgjedhur rrugën e tyre, të vendosin në ditët në vijim.
Ai vijoi akuzat ndaj kreut të qeverisë, duke thënë se me qëllimin për të mos lënë Partinë Demokratike të marrë pjesë në zgjedhje, ka marrë peng Alibeajn dhe Bashën.
“Edi Rama, të jap fjalën e nderit që do të përzëmë me votë dhe me protesta, me votë dhe mosbindje civile! Monizmin tënd do ta përmbysim me çdo kusht. Edi Rama me 2 pengje të veta, hyri në një lojë makbethiane për të mos lejuar PD-në të marrë pjesë në zgjedhje sepse ai e di që është i mundur. U them demorkatëve, u bëj thirrje në mënyrën më miqësore.
Të mendojnë, koha është të bashkohemi sot më shumë se kurrë në fitore. Demokratët që akoma nuk kanë bërë vendimin, janë të ftuar të mendojnë nëse janë me Shqipërinë apo me Edi Ramën dhe pengjet e tij. Ne jemi të bindur, në zgjedhjen e tyre, në mençurinë e tyre. Orteku elektoral i kësaj pranvere do njohë disfatën më të thellë të Edi Ramës dhe organizatës së tij kriminale”-tha Berisha.
Gjatë mbërritjes së tij, superstrada Lezhë-Milot u bllokua për disa minuta si pasojë e trafikut të shkaktuar.
Ndërkohë ditën e sotme, gjatë mbledhjes së Komisionit Qëndror të Zgjedhjeve, Ilirjan Celibashi tha se kryetar i Partisë Demokratike është Lulzim Basha dhe jo Sali Berisha dhe për këtë arsye nuk pranoi kërkesën që grupimi i Rithemelimit bëri për t’u regjistruar në zgjedhje nën logon e PD-së.
Nga ana tjetër, KQZ nuk pranoi as kerkesen e grupimit të Alibeajt për regjistrim në zgjedhje me argumentin se dokumentacioni i dorëzuar nuk është i plotë pasi nuk është në përputhje me Kodin Zgjedhor./m.j
