Po punohet për hartimin dhe miratimin e kornizës ligjore të procesit të hartimit të listës së pajisjeve mjekësore të rimbursueshme si për shembull për strishat e matjes së glicemisë, për lente intraokulare për kataraktin e syrit, etj.”. Lajmi bëhet me dije nga ministri i Shëndetësisë, Ilir Beqaj, i cili përmes kësaj interviste, dhënë për “Gazeta Shqiptare” shpjegon më konkretisht edhe risitë e listës së re të barnave me rimbursim, që hyri në fuqi në datën 1 qershor. Ndër të tjera, ministri thekson se ajo u shtua me 63 molekula e formëdoza, duke përmbajtur barna për më shumë kategori të sëmurësh kronikë.
Z.Beqaj, cilat janë risitë dhe përfitimet e listës së barnave të rimbursueshme për vitin 2016?
Lista e Rimbursueshme e Barnave (LBR) për vitin 2016 u zgjerua në 1118 barna alternative tregtare, nga të cilat 539 barna alternative të para. LBR 2015 përmbante 490 alternativa të para. Kështu, përmbledhtazi, në vetëm 3 vite, MSH dhe Fondi i Sigurimit të Detyrueshëm të Kujdesit Shëndetësor realizuan zgjerimin më të madh të LBR-së në 20 vite të marra së bashku, me 140 principe të reja aktive apo alternative dhe formëdoza të ndryshme. Përveç shtimit të numrit të barnave në LBR e këtij viti, çmimet e miratuara janë me një ulje prej rreth 6.9% krahasuar me çmimet e aplikuara në LBR-në e vitit 2015. Ky zgjerim i ndjeshëm i Listës së Barnave të Rimbursueshme u bë i mundur, pikë së pari, në sajë të mundësive të reja që u krijuan me rritjen e buxhetit të shëndetësisë nga 8 në 9 miliardë lekë, falë vullnetit politik në zbatimin e politikave të suksesshme, ku në këto tri vite arritëm të ulim mesatarisht 30% çmimin e shitjes së barnave në Shqipëri, duke iu kursyer shqiptarëve të paktën 70 milionë dollarë në vit, ose rreth 240 milionë dollarë në 3 vite. Së dyti, kjo listë mishëron më së miri edhe një angazhim të rëndësishëm të Programit të Qeverisë, i cili parashikon rritjen e rolit të shëndetit publik dhe programeve të parandalimit e të promocionit shëndetësor, veçanërisht për sëmundjet jongjitëse që kanë rritur përhapjen në Shqipëri, siç janë ato kardiovaskulare dhe tumorale, të cilat janë kthyer në ndikues të ndjeshëm në shkurtimin e jetëgjatësisë dhe jetës së shëndetshme. Së treti, LBR 2016 është një paketë e kujdesit shëndetësor, hartimi i së cilës është realizuar mbi bazën e parimeve themelore profesionale, që sigurojnë mbrojtjen më të mirë të mundshme të pacientit dhe shëndetit të tij, duke u bazuar pa dyshim, edhe në faktorë farmakoekonomikë si dhe duke vlerësuar kosto-efektivitetin e të gjitha barnave dhe alternativave e formëdozave përkatëse që janë në listën e rimbursimit.
Ju përmendët që janë ndjekur disa parime për hartimin e kësaj liste të re. A mund të na ilustroni konkretisht ndonjë rast?
Po sjellim si shembull dy raste barnash, që në këndvështrimin tonë ilustrojnë më së miri parimet që janë zbatuar në hartimin e listës së re të barnave të rimbursueshme. Bari “Olmesartan 10mg” u hoq nga lista, pasi çmimi i tij prej 72.30 lekë për tabletë është ndjeshëm më i shtrenjtë se çmimi 17.90 lekë për tabletë “Olmesartan 20mg”. Po ashtu, në të njëjtën logjikë, u hoq nga lista edhe bari “Olanzapine 5mg” që kushtonte 43.89 lekë, duke u zëvendësuar me formëdozën alternative 10mg që kushton 10.18 lekë. Buxheti i akorduar për shpenzimit e rimbursimit për vitin 2016, që arrin vlerën prej 9 miliardë lekësh, është bazuar në konsumin vjetor të barnave të rimbursuara për vitin 2015, rritjen vjetore të sëmundshmërisë, rritjen e ndjeshmërisë ndaj Skemës së Sigurimeve Shëndetësore dhe prirjen e rritjes vjetore të shpenzimeve të rimbursimit të viteve të fundit me rreth 10%.
A ka kategori të reja pacientësh që përfitojnë për herë të parë nga barnat që përfshihen në listën e re?
Në LBR 2016 vijnë për herë të parë 62 molekula dhe formëdoza të reja, me përdorim dhe mbulim të gjerë të sëmundshmërive në vend dhe një numri të madh pacientësh. Këto barna përmirësojnë dhe zgjerojnë ndjeshëm trajtimin e pacientëve në shërbimet e Onkologjisë, Gastro-hepatologjisë, Pneumologjisë, Reumatologjisë, Infektivit, në Terapinë Kardiake, sëmundjen e Parkinson-it, Diabet, Psoriazë, Dislipidemitë e ndryshme, si dhe sëmundjeve të tjera të gjakut, etj.
BW/d.i.
