“Sulmet ndaj meje janë të sponzorizuara nga ata që kanë humbur nga ulja e cmimit të ilaceve”. Kështu është shprehur Ministri i Shëndetësisë Ilir Beqaj, gjatë një interviste dhënë në emisionin “Oktapod” të Turjan Hyskës.
Sipas tij, askush nuk ka arritur ta joshë për të bërë lëshime, ndaj ka patur edhe sulme direkte, pasi cmimi i ilaceve është ulur me 30 përqind e mund të pësojë ulje të tjera. Ministri u shpreh se gjithcka ka bërë, e ka bërë konform ligjit, duke theksuar se nuk e mendon një burgosje të mundshme të tij. Për të katër koncensionet e përfolura, (Hemodializën, Check Up-in, Sterilizimin dhe ilacet kundër tumorit), nuk ka padi nga KLSH, ose të paktën dikasteri i tij nuk është vënë në dijeni. Duke vënë në dukje se vetëm godinat dhe rrogat e personelit janë publike, e gjithcka private, Beqaj tha se me koncensionet e dhëna, janë ndjekur pikë për pikë procedurat.
Gjatë pyetjeve të autorit të programit Turjan Hyska, Beqaj ka pranuar se ka njohje me Vilma Nushin, si sipërmarrëse e njohur për rreth 20 vjet. Sipas tij, nuk ka asnjë shkelje ligjore që ajo të ketë aksione në të dy kompanitë që kanë fituar koncensionin e Check Up-it, tek “Marketing&Distribution” dhe “Trimed”. Për të sqaruar situatën për dhënien me koncension, Beqaj u shpreh se personeli mjekësor është i gjithi i publikut dhe se pas 10 vjetësh, godinat dhe i gjithë investimi i privatëve, do t’i mbetet shtetit. Lidhur me tenderin e fituar nga ish-kompania e tij Intech plus, për instalimin e një programi kontabiliteti, Ministri pranoi se kompania ishte ofertuesi i vetëm, duke sqaruar se kontrata me të ishte nënshkruar që në vitin 2012, kur PS ishte në opozitë. Beqaj tha se zgjodhi se qe më mirë të instalohej programi i kontabilitetit që Fondi i Detyrueshëm i sigurimeve priste, edhe pse emri i tij mund të përbaltej. Duke u shprehur se aksionet tek kjo kompani i ka shitur që shtator të 2013-ës, Ilir Beqaj tha se është meritë e atyre që e kanë në pronësi sot, që kompania ka fituar 14 tendera publikë, këto vite.
Ministri i Shëndetësisë hodhi poshtë akuzat se është shkurtuar personeli mjekësor, duke u shprehur se numri i mjekëve është rritur dhe se shkurtime janë bërë vetëm në stafin sanitar. Beqaj nuk pranoi se në QSUT dhe qendra të tjera spitalore, nuk ka kushte dhe ilace, duke u shprehur për të kundërtën. Ministri njoftoi se që nga 1 nëntori 2015 është vënë në funksion edhe Urgjencën kardiake cdo ditë të javës, për të cilën më parë kishte thënë se nëse pëson kriza të shtunë e të dielë, spitali nuk të bën dot gjë se është mbyllur. Për Ministrin Shëndetësisë, shëndetësia falas nuk është premtim bosh, por ndoshta nuk është kuptuar, edhe për shkak të PR jo të mirë.
