Në fillim të vitit të ardhshëm, Spitali Rajonal i Shkodrës do të ketë gati një sallë tërësisht moderne të shërbimit të Reanimacionit. 500 milionë lekë është investimi që ka nisur tashmë, duke përfshirë rikonstruksionin e mjediseve të këtij shërbimi, si dhe furnizimin me pajisjet mjekësore.
Ministri i Shëndetësisë, Ilir Beqaj, ndoqi nga afër ecurinë e punimeve teksa u shpreh se në muajin mars, ky shërbim do të jetë tërësisht funksional dhe në dispozicion të pacientëve të Shkodrës. Kreu i Shëndetësisë theksoi se falë këtij investimi, spitali rajonal i Shkodrës do mund ti përgjigjet më mirë fluksit të pacientëve që do t’i vijë nga Kirurgjia e Përgjithshme, Ortopedia, por edhe rastet e ndryshme të traumave.
“Është një ndërhyrje e rëndësishme në Reanimacionin Qendror të spitalit rajonal të Shkodrës”, u shpreh ai, duke vënë në dukje se, punimet ndërtimore janë me vlerë rreth 150 milionë lekë, dhe po në spital është bërë dhe furnizimi i pajisjeve që do të vihen në punë me të mbaruar punimet e ndërtimit që janë rreth 350 milionë lekë.
“Pra janë 500 milionë lekë që investohen për të fuqizuar shërbimin e Reanimacionit të Përgjithshëm në spitalin e Shkodrës, të cilët bashkë me përmirësimet e bëra tashmë në Reanimacionin e Pediatrisë, dhe në reanimacionin e ri të Kardiologjisë, pjesën e shërbimit të reanimacionit në spital e plotësojmë, në mënyrë që volumi në rritje që do i vijë spitalit nga Kirurgjia e Përgjithshme, nga Ortopedia, të mund të zgjidhet sa më mirë edhe në këtë spital, plus edhe rastet e ndryshme të traumave cerebrale vaskulare që praktikisht janë të pashmangshme”, tha më tej Beqaj.
“Praktikisht Shkodra është një qark i madh, me popullsi të madhe, me epidemologji nga më të ndryshmet. Nga anagazhimet që ka dhe kontraktori që zbaton punimet ne besojmë se në muajin mars ky shërbim do të jetë funksional për pacientët e Shkodrës. Spitali ka marrë masa ndërkohë që është spostuar në një pjesë tjetër në mënyrë të përkohshme. Do të kërkonim dhe mirëkuptimin e të gjithë qytetarëve të Shkodrës, të të sëmurëve por dhe të familjarëve që gjatë kësaj periudhe 3-4 mujore do bëjmë një shërbim në një mjedis më të shtrënguar, por me qëllimin e mirë që nga pranvera të kemi një reanimacion shumë më të mirë”, u shpreh Ministri Beqaj.
Spitali rajonal i Shkodrës është duke u shndërruar në një model të ri të shërbimit mjekësor, modern e bashkëkohor, tërësisht i shndërruar, falë investimeve të shumta të bëra në dy vitet e fundit. 5 milionë dollarë janë investimet e realizuara deri tani, si dhe ato që kanë nisur tashmë së zbatuari, kryesisht nga buxheti i shtetit, me financime të huaja dhe nga partneriteti publik-privat, të cilat e plotësojnë funksionimin e spitalit rajonal të Shkodrës dhe e bëjnë një nga qendrat më të rëndësishme të veriut të Shqipërisë, por edhe në të gjithë vendin.
