Ministri Shëndetësisë dhe kryebashkiaku i Vlorës kanë vizituar sot ambientet e Shërbimit të Djegieve Plastike për të vëzhguar nga afër gjendjen e të plagosurave.
Në fjalën e tij, ministri Ilir Beqaj tha se vëmendja është me të dëmtuarat, ndërsa theksoi se tre prej të plagosurave janë në gjendje të rëndë.
“11 gra janë transportuar në shërbimin e djegies plastike në QSUt. Bësoj se kemi bërë një punë të mirë sa i përket reagimit të emergjencës. Janë katër misione me dy helikopterë që kanë transportuar të plagosurit. Këtu shërbimi ka marrë të gjitha masat dhe i kemi të gjitha pajisjet dhe barnat e nevojshme” – tha ministri i Shëndetësisë.
Beqaj tha se tre prej grave janë në gjendje të vështirë për shkak të djegieve dhe moshës së madhe.
Ndërkohë, kryebashkiaku i Vlorës, Dritan Leli, tha se eskursioni ishte i organizuar nga kisha. Ai theksoi se ka qenë në kontakt me ministrin e Shëndetësisë gjatë gjithë kohës ndërsa falenderoi shërbimin mjekësor.
“Jam i sigurt që të plagosurit janë nën përkujdesjen më të mirë të stafit të QSUT. Kam ardhur t’i takoj sëpari si mjek dhe për t’u sjellë vëmendjen e të gjithë qytetarëve të Vlorës këtyre zonjave” – tha Leli.
Ndërkohë, policia ka identifikuat viktimën e ngjarjes së rëndë sot në Kruje. Ajo quhet Violeta Gjika dhe është 65 vjeç.
(javanews.al / r.a)
