Ish- ministri i Drejtësisë i LSI, Ylli Manjani, thotë se e konsideron fyerje sentencën “kush flet për ndryshim sistemi bën lojën e Edi Ramës”.
Në një postim në rrjetin social “Facebook”, Manjani shprehet se mbetet mbështetës i rotacionit dhe i rikthimit të pluralizmit politik. Sipas Manjanit, sistemi zgjedhor është hajduti më i madh i votave.
“Me Edi Ramën kam patur mundësi të luaj e të bëj qejf si shumë të tjerë sot.
Por kam bashkëpunuar me sinqeritet dhe jam ndarë me shumë forcë prej lojrave të Tij edhe duke qenë brenda.
As kam luajtur e as luaj me Edi Ramën. Ndaj e konsideroj Fyerje të rëndë madje deklarimin se “…. bën lojën e Edi Ramës”! Gjithmonë për sa më takon mua. Nuk e di për të tjerë”, shkruan Manjani.
Sipas tij, sistemi zgjedhor, pra Proporcionali Ralonal që sot kemi është hajduti më i madh i votave.
“Përse qenkemi me Edi Ramën kur i themi se ky sistem jo vetëm e mban në pushtet por në pushtet monist madje?! Kush është me Edi Ramën, denoncuesit e sistemit hajdut, apo mbrojtësit e sistemit?! Kush është me Edi Ramën kritikët, apo ata që bëjnë marrëveshje me të?!
E përsëris: mbetem mbështetës i rotacionit dhe i rikthimit të pluralizmit politik.
Mbështes pra opozitën zyrtare si instotucionin e vetëm të demokracisë në vend.
Por, nuk pranoj fyerjen se qenkam me Edi Ramën”, shkruan Manjani.
Sipas tij, çështja e sistemit zgjedhor është thelbi i reformës zgjedhor.
Ndërkohë, mbrëmje e djeshme kryetarja e LSI-së, Monika Kryemadhi e ftuar në emisionin “5 pyetjet” tha se Reforma Zgjedhore duhej të ishte miratuar në Dhjetor nga parlamenti vetëm sipas rekomandimeve të OSBE/ODIHR, dhe se në Janar kryeministri Rama duhej të shpallte zgjedhjet e parakohshme.
Kujtojmë që Manjani u sulmua ditë më parë dhe nga Ilir Meta, sipas të cilit, Manjani po përdoret kundër presidentit.
g.kosovari
