Valon Behrami ka zbuluar se do ta festoj golin nëse shënon ndaj Kombëtares shqiptare në Euro 2016.
Valon Behrami sfidon hapur Shqipërinë. Kapiteni i Zvicrës nuk ka ndërmend të mendojë aspak për prejardhjen e që ka dhe thotë se 90 minutat e para të Euro 2016 duhet t’i menaxhojë shumë mirë emocionet.
Në një intervistë për “The Guardian”, 31-vjeçari premton se do të festojë në rast se i shënon Shqipërisë dhe shpjegon se nuk ka ndërmend të largohet nga kombëtarja e Zvicrës për të shkuar tek Kosova.
I dashuruar me Zvicrën
E quajnë “luftëtari” sepse bën gjithçka në fushën e lojës. Të gjithë grintën dhe dëshirën për të luajtur me pasion dëshiron ta shfrytëzojë vetëm për kombëtaren zvicerane.
“Unë jam shumë i lumtur që do të përfaqësoj Zvicrën dhe ngjyrat e këtij flamuri në Europian. Do të luftoj për këtë vend, i cili i ka dhënë gjithçka familjes time. Shpresoj të bëjmë një Europian sa më të mirë dhe të shkojmë larg”, tha 31-vjeçari.
Do të festoj ndaj Shqipërisë
Behrami është i bindur për festë ndaj Shqipërisë. Madje, ai thotë se do të festojë në rast se i shënon portierit Etrit Berisha.
“Festimi i një goli është pjesë e ndeshjes. Nëse do t’i shënoja Shqipërisë sigurisht që do të festoja. Për këtë nuk ka dyshime, sepse unë sa herë shënoj dua të festoj. Unë e dua shumë futbollin dhe kjo lojë është kënaqësi. Sigurisht që është një ndeshje delikate dhe duhet të dimë të menaxhojmë mjaft mirë aspektin psikologjik”, vazhdoi ai.
Nuk luan për Kosovën
Për momentin, mesfushori me origjinë nga Mitrovica ka thënë se nuk ka ndërmend të ndryshojë kombëtare.
“Unë e kam vendosur që do të luaj vetëm për një ekip kombëtar gjatë gjithë karrierës time”, tha Behrami duke dhënë një mesazh të qartë për Kosovën.
Pavarësisht se këta të fundit u pranuan në FIFA dhe UEFA, kjo gjë nuk e impresionon aspak Behramin./Express/a.m.
