Një studim i fundit ka zbuluar se i nxehti ekstrem i vitit të shkuar, ka ndodhur vetëm prej ngrohjes globale, të shkaktuar nga njeriu. Analiza e kryer nga shkencëtarë të “World Weather Attribution”, Climate Central dhe Qendrës Klimatike të Kryqit të Kuq e Gjysmëhënës së Kuqe, u publikua para Ditës globale të Veprimit kundër Ngrohjes Globale.
Për periudhën 1 maj 2024-1 maj 2025, thuhet se djegia e vazhdueshme e lëndëve djegëse fosile po dëmton shëndetin dhe mirëqenien e çdo kontinenti, me efekte më të mëdha në vendet që janë në zhvillim.
“Me çdo fuçi nafte të djegur, çdo ton dioksid karboni të çliruar, valët e të nxehtit do të prekin më shumë njerëz”, tha Friederike Otto, një shkencëtare e klimës në Imperial College London dhe bashkautore e raportit. Ditët përgjatë vitit që lamë pas ishin 90% më të nxehta se temperaturat e regjistruara nga viti 1991 deri në 2020-ën. Të paktën 49% e popullsisë globale përjetoi plot 30 ditë me nxehtësi ekstreme, ndërsa numërohen plot 67 ngjarje lidhur me këtë fenomen.
Më i prekuri ishte ishulli Aruba, në Karaibe, me 187 ditë vape ekstreme.
Viti 2024 ishte viti më i nxehtë i regjistruar ndonjëherë, duke tejkaluar vitin 2023, ndërsa janari i vitit 2025 shënoi janarin më të nxehtë të regjistruar ndonjëherë.
Ajo që theksohet në raport është se nuk u kushtohet rëndësi efekteve që nxehtësia ka në shëndetin e njeriut. Europa regjistroi më shumë se 61 mijë vdekje të lidhura me nxehtësinë në verën e vitit 2022, ndërsa në vende të tjera shumë njerëz vdesin prej sëmundjeve që shkaktohen nga ky fenomen.
