“Do të ishte më mirë të mos bëheshin lëshime publike përpara negociatave.” Kështu tha në Bruksel ministri gjerman i Mbrojtjes, Boris Pistorius, duke komentuar bisedimet mes presidentit amerikan Donald Trump dhe atij rus Vladimir Putin për çështjen e Ukrainës.
Sipas Pistorius, Rusia do të mbetet një kërcënim për sigurinë e Evropës edhe nëse një marrëveshje paqeje do të arrihet në Ukrainë.
“Do të ishte naive të besohet se ky kërcënim do të zvogëlohet edhe pas një marrëveshjeje paqeje, nëse arrihet ndonjëherë”, tha Pistorius, duke shtuar se kjo është arsyeja pse “ne duhet të investojmë më shpejt dhe më shumë në aftësitë tona të mbrojtjes dhe sigurisë”.
“Paqja mund të sigurohet vetëm nga një pozicion fuqie, siç kemi mësuar për fat të keq gjatë shekujve”, shtoi ai.
Sipas ministrit gjerman, Evropa duhet të përfshihet në negociatat për t’i dhënë fund luftës së agresionit të Rusisë kundër Ukrainës. Sa i përket vendosjes së mundshme të trupave për të siguruar paqen në Ukrainë, Pistorius thotë se ky debat është shumë i parakohshëm për të. “Ka disa mënyra për të siguruar paqen”, tha ai.
