Bashkimi Evropian ka reaguar pas ndarjes nga jeta të ish-komandantit të forcave serbe të Bosnjës, Ratko Mlladiç, si dhe ceremonisë së varrimit të tij në Beograd, ku iu bënë nderime shtetërore.
Në deklaratën e saj, Bashkimi Evropian i është referuar drejtpërdrejt glorifikimit të personave të dënuar për krime lufte, duke paralajmëruar se mohimi i gjenocidit dhe përpjekjet për të ndryshuar interpretimin e historisë së krimeve të luftës janë në kundërshtim me parimet evropiane. Brukseli thekson se këto qëndrime nuk kanë vend as në Bashkimin Evropian dhe as në shtetet që synojnë anëtarësimin.
Në të njëjtën kohë, BE-ja vë theksin te pajtimi dhe forcimi i marrëdhënieve të fqinjësisë së mirë në Ballkanin Perëndimor.
Mlladiç, ish-komandant ushtarak serb i Bosnjës, u dënua me burgim të përjetshëm nga Tribunali Ndërkombëtar Penal për ish-Jugosllavinë për gjenocid, krime kundër njerëzimit dhe krime lufte. Ai po vuante dënimin kur ndërroi jetë. Në reagimin e saj, BE-ja shpreh solidaritet me viktimat dhe të mbijetuarit e konflikteve të viteve ’90 në ish-Jugosllavi dhe rikujton rëndësinë e drejtësisë dhe pajtimit në rajon.
Reagimi i plotë i Bashkimit Evropian:
“Konfliktet e armatosura në Ballkanin Perëndimor të viteve 1990 ishin ndër momentet më të errëta të Evropës në historinë e saj të kohëve të fundit. Ne jemi në solidaritet me të gjitha viktimat, të mbijetuarit dhe familjet e tyre që vuajtën nga krimet e luftës në vendet e ish-Jugosllavisë.
Ratko Mladić ishte një kriminel lufte i dënuar i cili kishte kryer krime lufte, gjenocid dhe krime kundër njerëzimit. Ai vdiq ndërsa vuante dënimin me burgim të përjetshëm për krime kundër njerëzimit dhe gjenocidin në Srebrenicë. Tribunali Ndërkombëtar Penal për ish-Jugosllavinë e dënoi atë me burgim të përjetshëm në vitin 2017, duke i përshkruar krimet e tij si ndër krimet më të urryera të njohura nga njerëzimi.
Çdo glorifikim i kriminelëve të luftës, mohimi i gjenocidit dhe revizionizmi bien ndesh me vlerat më themelore evropiane dhe nuk kanë vend në BE ose në vendet kandidate për në BE. Pajtimi dhe marrëdhëniet e fqinjësisë së mirë në Ballkanin Perëndimor mbeten thelbësore për ndërtimin e një të ardhmeje të përbashkët.
BE-ja është partnere për të gjitha vendet në Ballkanin Perëndimor për të mbështetur përpjekjet e tyre për të nxitur pajtimin dhe stabilitetin rajonal, si dhe për të gjetur dhe zbatuar zgjidhje përfundimtare dhe gjithëpërfshirëse për mosmarrëveshjet dhe çështjet rajonale dhe dypalëshe të partnerëve tanë që kanë rrënjë në trashëgiminë e së kaluarës, në përputhje me të drejtën ndërkombëtare”.
