Kina po përshpejton kërkimet mbi përdorimin ushtarak të robotëve humanoide, duke shqyrtuar tashmë se si mund të përdoren ata në kushte reale luftimi .
Institutet kërkimore ushtarake po testojnë aftësitë e tyre, duke kërkuar teknologji për trajnimin e tyre dhe duke studiuar zhvillimin e njësive robotike që do të veprojnë së bashku me trupat , sipas një hetimi të Reuters mbi më shumë se 100 njoftime prokurimi ushtarak kinez, studime akademike, patenta, të dhëna qeveritare dhe materiale të kompanive të mbrojtjes.
Përpjekja kineze është pjesë e një gare më të gjerë globale për të shfrytëzuar sisteme autonome në fushën e betejës. Lufta Rusi – Ukrainë ka treguar tashmë potencialin e dronëve gjysmë -autonomë , të cilët përdorin inteligjencën artificiale për navigim dhe synim, ndërsa robotët po përdoren për të transportuar furnizime dhe për të rikuperuar të plagosurit .
Ky zhvillim vjen në një kohë kur Kina ka krijuar tashmë një pozicion dominues në tregun global të robotëve humanoidë . Prodhuesit kinezë përbënin rreth 95% të dërgesave globale të robotëve humanoidë në vitin 2025, sipas BofA Global Research, duke i dhënë Ushtrisë Çlirimtare Popullore (PLA) akses në një industri që po rritet me shpejtësi, ndërkohë që zhvillonte aplikacione ushtarake për teknologjinë.
Ky trend u bë veçanërisht i dukshëm pas Lojërave Botërore të Robotëve Humanoide në Kinë muajin e kaluar, ku robotët vrapuan, sulmuan dhe kërcyen , duke ofruar një spektakël mbresëlënës për audiencën.
Megjithatë, vetëm dy ditë pas përfundimit të Lojërave, gazeta zyrtare e PLA-së, PLA Daily, u bëri thirrje studiuesve të përshpejtojnë transferimin e teknologjive të përparuara nga laboratorët në fushat e stërvitjes ushtarake, me qëllim krijimin e “luftëtarëve” robotikë.
Hulumtimi mbi përdorimet ushtarake të humanoidëve filloi të fitonte vrull në vitin 2024 dhe u intensifikua në vitet 2025 dhe 2026, me interesin e përqendruar në perceptimin, manipulimin dhe të dhënat e nevojshme për të trajnuar robotët.
Për të marrë pjesë aktive në beteja
Kina ka zhvilluar tashmë skenarë për përdorimin e humanoidëve në luftë . Një studim i botuar në gusht 2025 nga studiuesit në qendrën e testimit të Universitetit Kombëtar të Teknologjisë së Mbrojtjes (NUDT) në Xi’an përshkruan një forcë prej gjashtë “robotësh beteje” – humanoide, qen robotikë ose automjete pa pilot – që do të ndaheshin në dy grupe sulmi.
Duke punuar me forcat tokësore , robotët mund të pastronin një ndërtesë të kontrolluar nga armiku , duke lëvizur nga një kat në tjetrin dhe nga një dhomë në tjetrën. Studimi u bazua në teknologjinë që studiuesit vlerësojnë se mund të jetë e disponueshme brenda pesë deri në dhjetë viteve të ardhshme. Megjithatë, nuk specifikohet se çfarë armësh do të mbanin robotët ose si do të përballeshin me praninë e civilëve.
