Brukseli po shqyrton me ritëm të shpejtë çështjen e vjetër të aseteve të ngrira ruse, që mund të përdoren për një huamarrje të madhe në favor të Ukrainës. Sipas Financial Times, Komisioni Evropian ka planifikuar që tashmë këtë javë të heqë rregullin që detyron Bashkimin Evropian të rinovojë çdo gjashtë muaj ngrirjen e fondeve të Bankës Qendrore ruse të bllokuara në Europë.
Për të shmangur veton e Hungarisë dhe Sllovakisë dhe për të miratuar ngrirjen pa afat, Brukseli synon të përdorë një klauzolë që i lejon të votohet masivisht me shumicë të kualifikuar. Bëhet fjalë për nenin 122, një klauzolë e krijuar për emergjencat ekonomike.
Kryeministri belg Bart De Wever ka reaguar ashpër, duke paralajmëruar një ankim në rast se BE vendos të miratojë huamarrjen e madhe me shumicë të kualifikuar. Sipas tij, nenin 122 nuk mund ta përdorësh për këtë rast, pasi bëhet fjalë për një sanksion që kërkon unanimitet. Nga ana tjetër, presidentja e Bankës Qendrore Evropiane, Christine Lagarde, e cila më parë ishte skeptike për përdorimin e aseteve ruse pa garanci të mjaftueshme, e ka mbështetur nismën e Brukselit. Lagarde tha se kjo është “zgjidhja më afër parimeve ndërkombëtare” dhe se bëhet fjalë për një “rast të jashtëzakonshëm që nuk cenon pronësinë ruse”.
Presidentja e Komisionit Evropian, Ursula von der Leyen, po përpiqet të sigurojë mbrojtje maksimale për Belgjikën, e cila ka shqetësime për asetet prej 185 miliardë eurosh të bllokuara në Euroclear. Synimi i Brukselit është që në Këshillin Evropian më 18 dhjetor të marrë miratimin për përdorimin e këtyre aseteve, duke emetuar obligacione që do të garantojnë një huamarrje prej 185 miliardë eurosh për rindërtimin në Ukrainë.
Sipas një burimi të besueshëm gjerman, shumica për miratimin ekziston. Përdorimi i aseteve nuk është vetëm një sinjal për Moskën pas katër vjetësh lufte në Ukrainë, por edhe një mesazh për Uashingtonin. Në planin e famshëm të paqes ruso-amerikane, firmosur nga Kirill Dmitriev dhe Steve Witkoff, negociatorët kishin parashikuar qartë përdorimin e aseteve për interesa të përbashkëta. Bashkimi Evropian synon të tregojë se këto fonde ruhen në Europë dhe vetëm Europa mund të vendosë për to.
Kryetari i Këshillit Evropian, Antonio Costa, konfirmoi dje në mëngjes: Po përcaktojmë detajet ligjore dhe teknike për të siguruar miratimin e paktën me shumicë të kualifikuar të shteteve anëtare. Mendoj se jemi shumë afër një zgjidhjeje.
