BDI-ja fitoi 13 komuna në Maqedoninë e Veriut, por humbi Tetovën dhe Gostivarin. Në këto dy komuna fituan Bilall Kasami nga Lëvizja Besa dhe Arben Taravari nga koalicioni ASH – AAA. Lideri i integristëve Ali Ahmeti tha se BDI-ja është fitues në kampin politik shqiptar, ndërsa si fitore të rëndësishme e veçoi Komunën e Kërçovës.
“Mirupafshim dhe mirë u takofshim sepse unë do të vazhdoj të festoj në Kërçovë bashkë me bashkëkombasit dhe me mërgatën që na ka nderuar dhe respektuar”.
Kryetarja e deritanishme e Komunës së Tetovës, Teuta Arifi, pranoi humbjen në këto zgjedhje lokale duke i uruar suksese kryetarit të ri të Tetovës.
“Qytetari i Tetovës ka vendosur që të ketë udhëheqësi tjetër komunale dhe gjithsesi unë këtë rezultat e pranoj si verdikt të popullit”.
Kryetari i ri i Komunës së Tetovës, Bilall Kasami, është zotuar se gjatë mandatit të tij, Tetovën do ta shndërrojë në qytet evropian.
“Ju garantojmë që Tetovën pas katër viteve do ta kemi një qytet evropian, një qytet me kushte më të mira për të jetuar”.
Kryetari aktual i Komunës së Gostivarit, Arben Taravari nga koalicioni ASH-AAA edhe katër vite do të jetë në krye të kësaj komune. Ai tha se në këto zgjedhje nuk ka shënuar fitore kundër kandidatit të BDI-së, por ndaj të gjithë qeverisë.
“Në këto zgjedhje ne kundërshtar nuk e kishim Nevzat Bejtën por Ali Ahmetin dhe krejt qeverinë, Oliver Spasovskin, BFI-në, Kryetarin e Parlamentit, Kryeministrin dhe gjithë qeverinë që këto dy javët e fundit ishin në Gostivar”.
Shqiptarët me mobilizimin e diasporës fituan Kërçovën, por humbën një komunë me shumicë shqiptare. Në Komunën e Bërvenicës me dhjetëra vota diferencë fitoi kandidati i VMRO-DPMNE-së, kundrejt kandidatit të pavarur, Enver Pajazitit. Gjithashtu edhe në Komunën e Çashkës fitoi kandidati i LSDM-së kundrejt atij të BDI-së.
/a.r
