Përveç raportit të Doing Business të Bankës Botërore, ku Shqipëria u rendit 35 vende më poshtë, një tjetër indikator, ai i Pagesës së Taksave e sheh Shqipërinë në vendin e 142 ndër 189 vendet e listës. Shqipëria pozicionohet tek vendet afër fundit të listës, sepse një biznes në vend duhet të bëjë brenda vitit 34 pagesa taksash e kësisoj të harxhojë rreth 357 orë për ti kryer ato.
Një tjetër problematikë përveç burokracisë është se treguesi i pagesës së taksave është përkeqësuar nga rritja e shkallës tatimore. Në raport Banka Botërore vëren se Shqipëria e bëri pagesën e taksave më të kushtueshme për kompanitë për shkak të rritjes së tatimit mbi fitimin. Sipas saj, nëse vjet një biznesi në Shqipëri i duhej të paguante në shtet mesatarisht 31.4 përqind të fitimit total në formën e taksave, këtë vit shuma u rrit në 36.5 përqind.
Në rajon kjo është norma më e lartë, përveç Greqisë, ku ndërmarrjet paguajnë si taksa mesatarisht 49 përqind të fitimit. Në ekonomitë e tjera fqinje, barra e taksave luhatet nga 12.9 deri në 23.3 përqind.
