Titulli i Bundesligës, i gjashti rresht për Bayernin, mund të jetë vetëm çështje kohe.Me 17 pikë epërsi në krye të tabelës, bavarezët mund të triumfojnë në ligë pesë ndeshje para se të përfundojë kampionati, nëse arrijnë fitore në shtëpi tek Augsburgu të shtunën, apo nëse vendi i dytë Schalke nuk e mposht Hamburgun si mysafir, transmeton KTV.
Bayerni është treguar i pamëshirshëm për kundërshtarët që prej rikthimit të 72-vjeçarit, Jup Heynckes, i cili e udhëhoqi ekipin drejt tripletës në vitin 2013, u pensionua, por më pas u rikthye në vendin e të shkarkuarit Carlo Ancelotti.
Nën drejtimin e Heynckes, Bayerni i ka fituar 18 nga 21 ndeshjet e Bundesligës, shtatë fitore rresht në Ligën e Kampionëve dhe mbërriti në gjysmëfinale të Kupës së Gjermanisë, por pavarësisht sukseseve, nuk mund ta bindin që të vazhdojë edhe për një sezon tjetër.
Në ndeshjen e parë të këtij kampionati, Bayerni fitoi me shifrat 3:0. Megjithatë, në këtë përballje Heynckes hyn pa lojtarët Alaba, Coman e Neuer, ndërsa në dyshim është Bernat.
Ndërkohë, Dortmundi i vendit të tretë, në shtëpi të dielën, e pret Stuttgartin, kurse Leipzigu që e mbyll top 4-shen gjermane, do të jetë nikoqir i Bayer Leverkusenit, përgatiti Express. (b.an)
