Bayern shtyn të paktën edhe për një javë festën e titullit, pas barazimit 1-1 në Allianz Arena kundër Borussia Moenchengladbach, ndërkohë që Borussia Dortmund fiton 5-1 kundër Wolfsburgut.
Me mendjen te ndeshja e së martës kundër Atletico Madrid për Champions League, trajneri Pep Guardiola bëri shumë ndryshime në formacion, megjithatë goli erdhi shumë shpejt, kur Müller shënoi që në minutën e gjashtë. Borussia, me të cilën Bayern nuk fitonte prej tri ndeshjesh radhazi, arriti të barazonte në pjesën e dytë, duke përfituar nga loja pa ritëm e vendasve.
Pas fitores së Dortmundit, diferenca shkon në pesë pikë, kur kanë mbetur edhe dy javë për t’u luajtur.
Titulli duket çështje kohe për Bayern, që i mjafton një fitore ose dy barazime në ndeshjet e mbetura, ndërkohë që vëmendja është te Atletico. Një lajm i mirë për bavarezët është aktivizimi i mbrojtësit Boateng, i cili mungonte që nga janari, kur u dëmtua në ndeshjen e parë të fazës së dytë.
D. Ikonomi
