Të gjitha Bashkitë që nuk kanë ende një plan të miratuar vendor do të vazhdojnë ta kenë të ndaluar dhënien e lejeve të ndërtimit deri në miratimin e këtij plani. Përjashtim do të bëjnë ato raste që cilësohen si projekte me interes publik për të cilat vendos Këshilli Kombëtar i Territorit. Ndërkohë 14 bashki që aktualisht kanë plane të miratuara vendore mund të japin leje ndërtimi, por vetëm në qytete, pa përfshirë komunat përreth.
Kjo u bë e ditur nga Ministria e Zhvillimit Urban Eglantina Gjermeni e cila theksoi se një tjetër përjashtim janë godinat nën gjashtë kate për strehim, të cilat mund të jepen nga të gjitha njësitë vendore në bashkëpunim me KKT.
“Njësitë e tjera vendore, të cilat nuk kanë plane vendore të miratuara vazhdojnë dhënien e lejeve të ndërtimit për disa kategori të cilat i ka miratuar KKT-ja. Sa i përket projekteve me interes publik në fushën e bujqësisë, turizmit, industrisë, këto leje jepen nga Këshilli Kombëtar i Territorit, Banesat individuale, që prej dhjetorit të vitit të shkuar u është dhënë hapësira njësive vendore që të vazhdojnë me dhënien e lejeve të ndërtimit për banesat individuale familjare”, deklaroi Gjermeni
Ministrja tha se qeveria do të asistojë financiarisht dhe teknikisht 26 bashki që të hartojne planet vendore dhe t’i kenë të miratuara ato deri në muajin shkurt. Për këtë qëllim është çelur një tender ndërkombëtar për të përzgjedhur kompanitë më të mira, që në bashkëpunim me bashkitë të hartojnë planet e përgjithshme vendore.
