Nga sot të gjithë qytetarët e Tiranës do të kenë mundësi që shpendët për festat e fundvitit t’i blejnë në tregun e organizuar dhe kontrolluar nga Bashkia e Tiranës në fshatin Vishnje të njësisë administrative Baldushk. Kryetari i Bashkisë së Tiranës, Erion Veliaj, ishte sot i pranishëm në tregun e shpendëve për të garantuar qytetarët për cilësinë e produkteve që tregtohen nga fermerët e zonës.
“Më vjen shumë mirë sot që në Baldushk, në fshatin e Vishnjes, hapim tregun e shpendëve. Ne duam ta ruajmë këtë traditë, por duam të ruajmë edhe qytetin. Kjo është një zgjidhje higjienike dhe e shëndetshme, që promovon ekonominë vendase”, tha Veliaj. Ai ftoi të gjithë qytetarët e Tiranës që të konsumojnë produkte lokale në një treg që ka të gjitha kushtet higjienike dhe me veterinerë që kontrollojnë cilësinë e shpendëve që shiten në Njësinë Administrative.
“Dua që qytetarët të mendojnë se si mund të ndihmojë ekonominë e vendit. I ftoj që të vinë të blejnë produkte lokale, të kenë gjelat e Baldushkut përpara se të mendojnë për mallin e importit. Vendi nuk është në një situatë ekonomike ku secili mund të përballojë çmime të shtrenjta”, tha Veliaj. Sipas tij, fokusi tek malli i vendit është një mënyrë, edhe për të kursyer para, edhe për të marrë cilësi. Kryebashkiaku vlerësoi se sa më shumë para të qarkullojë brenda vendit dhe të mbeten në fshatrat e Tiranës, aq më mirë për ekonominë e qytetit.
Gjatë dy javëve që tregu i Vishnjes do të qëndrojë i hapur për të gjithë banorët, veterinarë dhe inspektorë të Agjencisë së Mbrojtjes të Konsumatorit do të kujdesen për granatimin e cilësisë dhe ndaljen e abuzimit me çmimet. “AMK do të kujdeset me veterinerët e saj, që mos të kemi asnjë problem me higjienën dhe me cilësinë e produkteve. Dua t’i bëj thirrje të gjithë qytetarëve, blini produkte lokale! ‘Made in Tirana’ është cilësore, e lirë dhe e mirë”, deklaroi Veliaj.
Krahas tregut të shpendëve Bashkia e Tiranës ka menduar që gjatë festave të fundvitit të përfshihet në disa nisma solidariteti. “Për festat e fundvitit, bashkia do të dhurojë disa gjela për familjet në nevojë dhe ato me ndihmë ekonomike. Kjo është mënyra se si ne i bashkohemi kësaj nisme duke shpenzuar për të promovuar ekonominë vendase dhe të gjithë ata që tregtojnë në këtë zonë”, tha kryetari i Bashkisë së Tiranës, Erion Veliaj.
Drejtoresha e Agjencisë së Mbrojtjes së Konsumatorit, Rudina Hoxha, u shpreh produktet që tregtohen në zonën e Vishnjes janë të garantuara. “Ajo që mendoj se duhet të jemi vërtet të gëzuar këtë periudhë është që konsumatorit të Tiranës po i ofrohet produkti vendas, gjeli i Baldushkut, të cilët kanë kërkuar ta kenë gjithmonë në tavolina. Por, kësaj radhe është një produkt i sigurt, kjo falë edhe administratorit, i cili do të bëj të mundur certifikimin e të gjithë këtyre fermerëve, që do shesin në këtë treg”, tha Hoxha.
Ndërsa nënkryetari i Bashkisë së Tiranës, Andi Seferi, deklaroi se përveç produktit të zonës, qytetarët e Tiranës do të vinë të bëjnë shpenzimet e tyre, por edhe të njihen me bukuritë e kësaj zone. “Ajo që Bashkia e Tiranës ofron në këtë fundvit është një paketë ndërmjet ushqimit, ndërmjet natyrës, ndërmjet banorëve dhe produkteve të tjera bio të kësaj zone. I bëj thirrje qytetarëve të Tiranës që të solidarizohemi me këto produkte, që të jetë një ndihmesë, si për këtë zonë, por që janë edhe të garantuara”, u shpreh Seferi.
Tregu i shpendëve në Vishnje është i katërti, pas tre tregjeve që janë hapur në qytet, kushtuar festave të fundvitit. Bashkia e Tiranës do të vijojë me hapjen e tregut në zonën e “Ali Demit” dhe të “Kombinatit”, ku në fokus do të jenë fermerët lokal që prodhojnë ‘Made in Tirana’ dhe prodhime të tjera vendase.
