Nis puna për rikualifikimin urban e një tjetër blloku banesash në kryeqytet. Bashkia e Tiranës po zbaton projektin e rikualifikimit urban të lagjes përgjatë rrugës “Vëllezërit Manastirliu”, i cili parashikon ndërhyrjen në një sipërfaqe prej rreth 3.5 ha, ku përfshihen punime edhe në 8 segmente rrugore. Nisja e punimeve u inspektua nga kryetari i Bashkisë së Tiranës, Erion Veliaj, i cili theksoi se, edhe në këtë lagje, investimi i bashkisë synon të sjellë standarde të barabarta jetese si në çdo zonë tjetër të kryeqytetit, ku është ndërhyrë deri më tani.
“Më vjen mirë që po ndërhyjmë në Rr. “Vëllezërit Manastirliu”, që njihet ndryshe si blloku mbas rrugës së ambasadave. Ka ardhur koha ta bëjmë këtë lagje si ‘jashtë shtetit’, me infrastrukturë të denjë, duke qenë se ndodhet shumë pranë selive diplomatike të Tiranës”, tha Veliaj. Ai falenderoi banorët që janë treguar të gatshëm të ngushtojnë oborret e tyre, për të krijuar hapësirat e nevojshme publike. Ky bashkëpunim, sipas Veliajt, ka bërë të mundur që tashmë, edhe fëmijët, të kenë më shumë mundësi të luajnë në hapësira kushtuar atyre.
“Ky një është lajm i mirë, sidomos për fëmijët, të cilët do të kenë mundësi të luajnë në hapësirat që kemi rikuperuar nga zaptimet pa leje; do të kenë mundësinë të rriten në një qytet ku mund të luash, ku mund të ëndërrosh, ku mund të bësh aktivitet fizik dhe të kesh një jetë të shëndetshme”, tha ai. Kryebashkiaku Veliaj garantoi se Bashkia e Tiranës do të vazhdojë të punojë me moton e saj: “Një punë konkrete çdo ditë”.
“Është e vetmja përgjigje që njohim për t’i bërë ballë një mentaliteti, i cili kur e kishte në dorë Tiranën, fjeti gjumë, kurse tani shan edhe shpif, ndërkohë që fokusi duhet të jetë, si ta ngrysim ditën me një punë në dobi të qytetarëve. Bashkia e Tiranës ka vetëm një qëllim: T’i shërbejë qytetit! Do të thotë që interesi i madh i qytetarëve është shumë herë më i fuqishëm se interesi i vigël i dikujt që zë një hapësirë publike, bllokon një trotuar ose ndërton një mur në mes të rrugës”, përfundoi ai.
Kryetari i Këshillit Bashkiak, Aldrin Dalipi, theksoi se puna është përgjigja më e mirë e bashkisë dhe e mazhorancës në këshill, për çdokënd që fokusohet te kritikat. “Jam i kënaqur që në emër të Këshillit Bashkiak vij e shikoj nga afër vendimet që kemi marrë, të cilat përkthehen në punë konkrete. Por, gjithashtu kam edhe një përgjigje për ata që nuk fokusohen te puna, po te fjalët: Duhet të bëhen pjesë e ndryshimit, që të kenë mundësi edhe ata të jenë përballë qytetarëve e të ndjehen mirë, përndryshe le të vazhdojnë me fjalët. Bashkia e Tiranës, mazhoranca në Këshillin Bashkiak, dhe të gjithë ata që kanë zgjedhur të punojnë, do ta vazhdojnë këtë punë fort, ditë për ditë, dhe pa u ndalur”, tha ai.
Rikualifikimi urban i bllokut në rrugën “Vëllezërit Manastirliu” parashikon ndërhyrjen në 8 akse rrugore. Në të gjitha këto segmente do të punohet për shtrimin e rrjetit të plotë të kanalizimeve për ujërat e bardha dhe të zeza, asfaltimin, ndërtimin e trotuareve, por edhe vendosjen e sinjalistikës vertikale dhe horizontale, si edhe ndriçimin. Në fillimet dhe fundet e çdo segmenti, si dhe në vendet e kalimit të këmbësorëve në rrugë, trotuari do të ndërtohet i ulur, për të bërë të mundur, lëvizjen lirshëm për njerëzit me aftësi të kufizuar, karrocave të fëmijëve etj. Brenda blloqeve të banimit do të krijohen tre sheshe si ambiente çlodhëse, të cilat do të jenë të plotësuara me gjelbërim, stola, kosha dhe lodra për fëmijët.
