Bashkia e Tiranës ka mohuar lajmet e publikuara në disa media për një konflikt në zyrën e kryebashkiakut Erion Veliaj. Përmes një komunikate për mediat, Bashkia e Tiranës thekson se informacione të tilla për një konflikt janë të pavërteta dhe keqinformuese.
“Tensionet artificiale të ngritura nga opozita në mbledhjen e fundit të Këshillit Bashkiak e të amplifikuara në thashetheme konfrontimesh, nuk kanë asnjë bazë e nuk ndihmojnë asnjë kauzë për qytetin.
Bashkia e Tiranës sqaron se çdo lëvizje në administratën e saj bëhet duke zbatuar të gjitha ligjet në fuqi, por gjithmonë duke mbajtur parasysh, nga njëra anë nevojën për të pasur një administratë të qëndrueshme, jo politike, dhe nga ana tjetër domosdoshmërinë që punonjësit e saj të jenë sa më të aftë dhe të kualifikuar.
Bashkia e Tiranës është e vendosur t’i shërbejë qytetit 24/7, e ta bëjë këtë me njerëzit më të kualifikuar të mundshëm, për të transformuar shërbimet e qeverisjen e Tiranës.” thuhet në deklaratën e Bashkisë
