Bashkia e Dimalit ka zhvilluar sot një mbledhje urgjente të Këshillit Bashkiak.
Qëllimi i kësaj mbledhja ka qenë miratimi me votat e këshillit i mosshkrirjes së bashkisë si pjesë e Reformës Territoriale që ka propozuar PS.
Fillimisht, në mbledhjen e zhvilluar u lexua relacioni i propozuar për shkrirjen e bashkisë Dimal dhe bashkimin e saj me Bashkinë Berat. Sipas relacionit, të vetmet arsye të parashtuara në të kanë qenë: lidhja historike e hershme, ish-rrethet, shtrirja përgjatë lumit Osum dhe ekzistenca e Spitalit në Berat, arsye këto që sipas anëtarëve të Këshillit Bashkiak Dimal nuk përputhen me analizën e raportit të ekspertëve.
Sipas këshilltarëve bashkiakë, Bashkia Dimal në këto 10 vitet e fundit ka pasur një mesatare 38% të investimeve të kryera me buxhetin e vet aktiv, duke e renditur Dimalin të 5 në rang vendi, ndërsa Bashkia Berat e ka pasur këtë parametër në mesataren 7%.
Sipas këshilltarëve, ndryshe nga sa konsiderohet në relacion, “shkrirja nuk do të sjellë për Dimalin kapacitet të shtuar investues, bashkimi me Beratit do të ndikojë negativisht në ekonominë e zonës, sidomos për fermerët e kësaj bashkie që eksportojnë prej vitesh prodhimet e tyre bujqësore dhe të serave në tregjet ndërkombëtare”.
Pas diskutimeve të këshilltarëve bashkiak, të gjithë njëzëri dolën në përfundimin se:
“Në relacion, në kundërshtim me nenin 89, nuk argumentohen as me fakte dhe as me studime fizibiliteti avantazhet e kësaj shkrirjeje”.
Pra, duke argumentuar se në këto kushte propozimi është i pavlefshëm, 18 nga 21 anëtarët e Këshillit Bashkiak Dimal kanë miratuar me votat “Pro” pavlefshmërinë e këtij propozimi dhe po me votat “Pro” mosshkrirjen e Dimalit si bashki.
