Kryetari i partisë Demokratike Lulzim Basha deklaroi se me zgjedhjen e Arta Markut Kryeprokurore vetëm me votat e mazhorancës, u shkelën dy aspektet themelore të reformës në drejtësi që sipas tij janë moskapja e institucioneve dhe vettingu.
Ai theksoi në studion e “Top Story” përballë Sokol Ballës se Mënyra se si u zgjodh kryeprokurorja është antikushtetuese.
“Qëllimi i reformës në drejtësi është një sistem i pakapur. Dy aspektet kryesore janë vettingu dhe moskapja politike e institucioneve. Ku jemi sot, sot kemi një kryeprokuror pa vetting. Sot kemi një kryeprokuror të emëruar për herë të parë nga më pak se gjysmat e deputetëve. Nuk ka fare rëndësi se cili person u kap dhe u fut në atë detyrë. Kushdo qoftë personi, mënyra se si u keqpërdor duke u emëruar pa vetting, pa konsensus, në një moment kritik për hetimin e një ish-ministri të brendshëm, për herë të parë ne Evropë, në këto kushte është utopi të mos mendojmë se një kryeprokuror i tillë nuk ka qëllim mbylljen e dosjeve të krimit”, deklaroi Basha.
Basha thotë se përmes kësaj po synohet të shkatërrohet reforma në drejtësi, që e quan shpresë të shqiptarëve. Sipas tij, qëllimi kryesor është mbyllja e dosjeve të krimit siç është ajo e ish-ministrit Tahiri.
“Po përpiqen të shkatërrojnë shpresën tjetër të shqiptarëve, që është reforma në drejtësi duke e kapur atë dhe duke mbrojtur krimin, duke shkatërruar dosjet e krimit, të ndalimit apo kompromontimit të dosjeve të Saimir Tahirit, Vangjush Dakos, Balilajt dhe Habilajt, që janë konfirmuar si shtyllë dhe aleatë të pushtetit të Ramës”, shtoi kreu i PD.
Sipas kreut të PD-së nuk ka asnjë mënyrë tjetër që Rama të mbrojë veten dhe ministrat e tij të korruptuar dhe të lidhur me krimin.
“Pa kapur institucionet me vendime ekstraligjore, ekstrakushtetuese. E keqja ka kapluar sot edhe institucionet e pavarura. Kjo është një krizë e thellë e vendit. Ne nuk mund të jemi një opozitë europiane, normale kur ne nuk kemi zgjedhje normale, kur shkelja e Kushtetutës është një precedent që zor se e qenë në diktaturat afrikane dhe aziatike”, thotë Basha.
Kryedemokrati shton gjithashtu se tashmë nuk bëhet më fjalë për krizë prokurori, por për një krizë më të madhe.
“Ka krizë kushtetuese, produkt i një krize politike: kemi një qeveri pa mandat popullor një Parlament që ka dalë nga zgjedhje të tjetërsuara me paratë e drogës dhe krimit dhe paratë e drogës dhe krimit janë vetë problemi”, u shpreh ai.
/a.m.
