Duket se kryetari i PD-së, Lulzim Basha, ka bërë një tërheqje taktike sa i përket krizës që ai dhe partia që drejton ka provokuar prej kaq muajsh në Bulevardin kryesor të kryeqytetit. Në deklaratat e tij përpara mbështetësve të PD në çadër Basha ka lënë të hapur opsionin sa i përket zgjedhjeve me standarde të larta, duke u tërhequr taktikisht nga kërkesa për qeveri teknike. “Ti japim fund krizës me dialog. Nuk kërkojmë pushtet në tavolinë. Ramës nuk i kërkoj të shporret edhe pse e meriton. I kërkoj Ramës të lejojë popullin të votojë”, deklaroi Basha.
Sipas tij, sot është një mundësi për ta zgjidhur krizën me dialog. Ai tha se negociatat e sotme duhet të çojnë drejt një zgjidhje dhe i bëri thirrje maxhorancës që t’i hapë rrugë arsyes dhe dialogut.
“Fundi nuk do jetë votim pa opozitën, shpërndarje e popullit, fundi do të jetë fitorja e kauzës sonë të drejtë. Urojmë që sot arsyeja e shëndoshë të mbizotërojë edhe te mendjet e sëmura te ata që duan të marrin peng zgjedhjet. Ti lutemi zotit edhe për kundërshtarët tanë. Të shpresojmë që rruga e arsyes dhe dialogut do të na çojë drejt një bashkimi kombëtar për Shqipërinë Europiane. Një gjë është e sigurt përmes dialogut ose përmes përballjes populli do të fitojë gjithmonë”, u shpreh Basha.
javanews.al/ma.me
