Lulzim Basha ndodhet në Maltë për punimet e Kongresit të Partive Popullore Europiane, ku zhvilloi një takim me kryeministrin hungarez, Viktor Orban.
Sipas njoftimit të shpërndarë nga Partia Demokratike, Basha dhe Orban diskutuan për zhvillimet politike në Shqipëri dhe për “kërcënimin e zgjedhjeve të lira dhe të ndershme nga krimi i organizuar dhe paratë e drogës me lidhje qeveritare”.
Basha ka informuar kryeministrin hungarez për kauzën e Partisë Demokratike për zgjedhje të lira dhe të ndershme dhe kërkesën për qeveri teknike, që sipas tij, do të zbatojë dekriminalizimin, luftojë drogën dhe paratë e pista duke krijuar kushtet për zgjedhje të lira dhe të ndershme.
Në njoftimin e shpërndarë nga PD, thuhet se Orban i deklaroi mbështetjen e plotë të partisë simotër FIDESZ për aksionin e opozitës shqiptare, që synon garantimin e votës së lirë e të ndershme në vend.
Gjatë punimeve të Kongresit të të djathtëve europianë, Basha pritet që të mbajë fjalim në seancën plenare si dhe të zhvillojë takime me udhëheqës të partive partive të djathta europiane.
