Kryetari i PD-së Lulzim Basha, teksa situata para kryeministrisë është përkeqësuar, falënderoi qytetarët që iu bashkuan thirrjes së opozitës së bashkuar.
Sipas tij, shqiptarët sot kanë vetëm një mision, largimin e Ramës dhe Shqipërinë si gjithë Europa.
“Mirë se jeni mbledhur në Kuvendin dhe referendumin popullor. Mirë se keni ardhur në kuvendin e sovranit. Jemi mbledhur sonte këtu, me një kushtrim, me një qëllim, me një mision, për të mos pranuar më kurrë, Shqipërinë e krimit, Shqipërinë e korrupsionit, Shqipërinë e hajdutërisë së Edi Ramës, por për Shqipërinë si gjithë Europa. Nuk të lëmë më të bllokosh rrugën tonë drejt Europës. Rama ik!
Kanë burgosur dhe rrahur baballarë dhe nëna. I kanë mbytur me gaz fëmijë në shtëpitë e tyre për t’i grabitur. Kanë arrestuar studentë, duan të asgjësojnë Akademinë e Shkencave, kanë çuar drejt vetëvrasjes kryefamiljarë, por kriminelët nuk i prek Prokuroria e kapur, nuk i pret drejtësia e korruptuar sepse ata i binden një njeriu që e ka lidhur pushtetin me krimin dhe me krimin do të kapë Shqipërinë, por kjo nuk ka për të ndodhur.
Do ta çlirojmë Shqipërinë nga zgjedhjet e vjedhura. Kjo është rruga e vetme për të mundësuar Shqipërinë në Europë’, ka thënë Basha.
Basha e konsideroi mision hyjnor, Shqipërinë si gjithë Evropa. “Për të realizuar misionin tonë hyjnor që është Shqipëria si gjithë Evropa duhet ta fitojmë këtë betejë me patjetër. Me këtë ëndërr jemi mbledhur dhe kemi bërë hapa përpara. Kemi qëndruar në ditët më të zeza të diktaturës dhe Tiranisë së krimit. Kemi kërkuar dënimin e atyre që vodhën zgjedhjet, propozuam vettingun politik, por bashkimi i Edi Ramës me krimin ka një përgjigje, të dhunojë shqiptarët. Katër nga shtatë anëtarët e të ashtuquajturës Task Forcë duhet të jenë sot në burg. Janë sot të pandëshkueshëm si të gjithë kriminelët e tjerë”, u shpreh ai. / i.h
