Basha sulmon Xhafajn dhe shkakton kaos në seancë, më pas braktisin Kuvendin

Kryetari i Partisë Demokratike, Lulzim Basha ka sulmuar ashpër ministrin e Brendshëm Fatmir Xhafaj, të cilin e akuzon se ka mbrojtur vëllain e tij nga arrestimi edhe pse është  i dënuar nga Italia për trafik dorge.

Teksa kreu i Kuvendit i ndërpreu fjalën Bashës pasi i mbaroi koha, deputetët e PD bllokuan foltoren. Në këto kushte, kryetari i Kuvendit Ruçi vendosi ndërprerjen e seancës.

Pavarësisht thirrjeve të Ruçit për të liruar foltoren dhe vijuar normalisht punimet e seancës, deputetët e PD dhe LSI, vijojnë ta mbajnë atë të bllokuar. Pas këtij momenti Ruçi ndërpreu seancën për pesë minuta, por nuk vlejti për pakicën parlamentare. Lulzim Basha vijoi të mbajë fjalimin e tij.

Edhe pse nuk u transmetua në media për shkak se kamerat e televizioneve dolën jashtë Kuvendit, një gjë e tillë u pasqyrua në rrjetet sociale. Seanca u trasmetua nga Facebook-u i kryetarit të PD Lulzim Basha dhe paraardhësit të tij, Sali Berisha.

Pasi shkaktuan kaos në Kuvend dhe uzurpuan foltoren, deputetet e opozitës vendosën të braktisin punimet e seancës

“Fatmir Xhafaj e mohoi përfshirjen e vëllait të tij në trafikun e drogës, por dje publikoi fakte që vërtetojnë dënimin e vëllait të ministrit. Agron Xhafaj drejton një organizatë kriminale Shqipëri-Itali-Poloni-SHBA, ai furnizonte organizatën kriminale me kokainë dhe marijuanë. Ai është dënuar me 7 vjet e 2 muaj burg me vendim të formës së prerë. Këto janë fakte, por ministri thotë se ai u gjend në vendin e gabuar dhe kohën e gabuar. Agron Xhafaj jeton i lirë në Shqipëri. Fatmir Xhafaj ka përgjegjësi ligjore për vëllain e tij, e ka detyrë të verifikojë dënimin e tij në Itali dhe të merrnin masa që ai të arrestohej. Pse nuk vepron “Forca e Ligjit” për vëllain e ministrit të Brendshëm. Dje Xhafaj pranoi atë që kishte mohuar, dënimin e vëllait të tij. Por pse nuk ka përmbushur përgjegjësite ligjore për arrestimin dhe ekstradimin e tij“, deklaroi Basha

Kryetari i PD, ka akuzuar Xhafajn që ka falsifikuar kodin e procedurës penale për të shpëtuar vëllain e tij.

“Fatmir Xhafaj ka falsifikuar nenin e kodit të procedurës penale si kryetar i komisionit të reformës në drejtësi dhe garantoi paprekshmërinë e vëllait të tij. Fatmir Xhafaj falsifikoi kodin e procedurës penale për të shpëtuar vëllain e tij“, tha Basha.

Javanews.al/a.ç