Kryetari i PD Lulzim Basha ka akuzuar kryeministrin Rama se i ka vënë shkelmin qytetarëve dhe intersiot publik. sipas tij, ndërsa pushtetarët pushonin fëmijët në Bulqizë rropateshin për një kore bukë.
“Rama i mohoi publikisht këta fëmijë duke i braktisur. Fëmijët u helmuan nga tymi i korrupsionit ne Dibër. Qeveria dha 4.8 mln euro një kompanie që s’ka bërë asgjë s’ka hedhur asnjë tullë. Pas kompanisë qëndron ministri Ahmetaj dhe shefi i tij Rama. Qeveria dha 2 mln euro për pisha pasi shpërdoroi 800 mijë euro për palmat e thara. Rama i ka vënë shkelmin interesit publik dhe qytetarëve”, deklaroi Basha.
“Këto dy javë treguan edhe diçka shumë të rëndë. Edi Rama dhe Xhafaj nuk mund të luftojnë krimin. Disa javë pas operacionit “Forca e Ligjit”, rezultatet janë qesharake. Janë kapur vetëm dy fshatarë me 130 gramë marijuanë dhe u përpoqën të shiteshin se kokat e trafikut të drogës. Policia është totalisht e ritahirizuar. Ngjarja më e madhe ishte ceremonia për shoferët që i japin më mirë makinës. Ndërkohë, në Vlorën ku Edi Rama është deputet, shpërthejnë makinat nga tritoli dhe bëhet luftë mes bandash. Vetëm ditën e sotme pasiguria ka marrë një forma tragjike të shpërthimit të automjeteve në Tiranë e Shkodër. Këto episode marrin jetë njerëzisht, kalimtarë të pafajshëm”, u shpreh Basha.
Sa i përket gomones së kapur me drogë në Greqi, Basha tha se ajo u kap vetëm kur autoritetet greke vendosën të mos njoftonin palën.
Sipas tij, nëse autoritetet shqiptare do të ishin njoftuar, operacioni nuk do të mund të zhvillohej, pasi do ishin njoftuar trafikantët.
“Ndërkohë që policët përdoren për të bërë klipe, në Vlorën ku Rama është kryeministër, dhe Xhafaj ka origjinën, shpërthejnë makina me eksploziv. Në vend që të luftojnë krimin, luajnë teatër. Grupet kriminale vazhdojnë të paratrazuar trafikun e drogës, pa iu hyrë gjemb në këmbë. 1.6 ton drogë në gomone u kap nga autoritetet greke, vetëm në momentin kur ata vendosën të mos njoftonin autoritetet shqiptare për operacionin. Deti vazhdon të jetë autostradë e drogës”, tha Basha.
Sakaq, kryedemokrati u ndal edhe tek paratë e dhënë nga qeveria Rama për koncesione, duke u shprehur se këto para duhet të investoheshin në funksion të qytetarëve.
“Ndërkohë që në Tiranë pushtetarët pushonin dhe gëzonin, fëmijët e Bulqizës, vazhduan të rropaten, duke rrezikuar jetën dhe shëndetin e tyre në të ftohtë, në shi, për një kore bukë. Pak javë më parë, Rama i mohoi botërisht këta fëmijë, në mes të Bulqizës, duke i vulosur fatin e tyre të mjeruar për sa kohë ky mban çelësat e qeverisjes. Fati i keq i përndoqi këta fëmijë edhe në shkolla. Dhjetëra fëmijë u mbytën nga tymi i një pajisje të montuar keq në shkollë. Po këto ditë, një kompani fantazmë të cilës qeveria i ka dhënë koncesionin djegies së plehrave, mori 4.8 mln euro nga buxheti i shtetit pa bërë asgjë. As ka filluar ndërtimin, as ka gërmuar themelet, asgjë.
Po si ka mundësi që një qeveri të japë 4.8 mln euro për një kompani që nuk ka bërë asgjë, dhe të mos mendojë për fëmijët e mjeruar që rropaten shpateve për bukën e gojës. Por përgjigjja është e thjeshtë, se pas kësaj kompanie qëndron Rama dhe Ahmetaj. Po kështu qeveria ka vendosur të japë një tjetër fond të majmë për zëvendësimin e palmave me pisha. Këtë mund ta bëjë vetëm nëj qeveri dhe kryeministër që i ka vënë shkelmin qytetarëve të vet. Një kryeministër që s’mund të jetë as i përgjegjshëm, dhe as serioz”, tha Basha.
