Kryetari i Partisë Demokratike Lulzim Basha ka komentuar nga çadra e protestës kërkesën e mazhorancës për të shtyrë afatin e regjistrimit të subjekteve dhe koalicioneve në KQZ, për t’i dhënë mundësi opozitës të bëhet pjesë e procesit.
Basha ka deklaruar se Rama dhe Meta shkelin Kodin Zgjedhor me përjekjet e tyre, teksa shton se asgjë nuk do ta bëjë opozitën të tërhiqet nga qeveria teknike.
“Kodi Zgjedhor thotë që sot skadon afati i regjistrimit të koalicioneve, këta e kanë futur veten në një spirale krize politike. Na del si engjëll, po shtyn datën e regjistrimit për të mriën tonë, për të mirën e shqiptarëve, jo për të mirën tonë. Zgjedhje të lira do ketë vetëm me qeveri teknike që do luftojë drogën e do krijojë kushtet për zgjedhje të lira”, tha Basha.
Më tej ai komentoi edhe deklaratat e Ramës pas kërkesës adresuar në KQZ.
“Sa për thënien ‘ti me bukë ne me gurë’ të themi se nuk ndahet mjalti me shëllirë”, tha më tej Basha./a.m.
